Jch Sighart der Gnewzz vnd mein Hausvraw vnd all vnser erben, Wir veriehen offenleich mit dem prief vnd tu^en chunt allen den, di in sehent, ho^erent oder lesent, Das wi^er mit wolbedachtem mu^et vnd nach vnserer pesten frewnt Rat vnd gu^etem willen ze der zeit vnd weil, da wi^er es wol getu^en machten, Recht vnd redleich ze chawffen haben gegeben ze rechtem chaufrecht nach Lantzrecht ob der Ens vnsern Hof ze Huntprenning, das (sic) gelegen ist in Grey^emhartsteter pharr in wa^echsenwerger Grafschaft vnd der vnser recht lehen ist von vnserm gna^edigen Herren dem Hertzogen von O^esterreich von derselben Grafschaft, Mit allen eren, nu^etzen vnd rechten, di darzu^e geho^erent ze Holtz, ze veld, ze wismad, versu^echt vnd vnuersu^echt vnd als er von alter her chomen ist, vnserm getrewn Chu^enraten vnd seiner Hausvrawn vnd allen i^eren erben vmb ain gelt, des wi^er von in gantz vnd gar verricht vnd gewert sein ze den rechten ta^egen an all scha^eden. Wir haben auch in den obgenanten Hof ingeantwu^ert vnd pesta^ett mit aller statt vnd darzu^e geho^ert aus vnser nutz vnd gewer in di i^ern mit der beschaiden, das man vns dovon raichen vnd geben vnd di^enen schol alle Jar ja^erichleich Sechs metzen Chorn vnd Zwaintzk metzen habern geebenter mazz vnd ain Swein, das dreyr schilling phenninge wert sei vnd sechs Cha^es, das yeder cha^es dreyer phennig wert sei, vnd sechs Hu^ener vnd drew phunt o^el vnd ain scho^et haribs vnd zwelif phennig vmb weinacht prat vnd sechtzk ayr ze Ostern vnd zu dem chorn tzwen tag ze akcher gen mit ainem phlu^eg vnd ainen tag ain E/edros vnd zu dem habern ainen tag ze akcher gen mit ainem phlu^eg vnd ain E/odros vnd ainen mader und ainen Sniter, Vnd wer abvert, der schol geben Sechtzk wienner phennig, vnd wer aufvert als vil vnd nicht mer di^enstes. Wi^er sein auch des obgenanten Chaufrechtz i^er Herren vnd i^er gewern, wo in des not vnd du^erft geschi^echt nach Lantzrecht ob der Ens. Vnd des ze ainem vesten vnd sta^oten v^erchunt geben wi^er in den prief versigelt vnd wol besta^ett mit meinem anhangundem Jnsigel vnd ze ainer pessern sicherhait vnd gezewgnu^ezz mit der Erbern Chu^enratz di zeit Pu^erkgrafen ze Wächfenwerch vnd Wernhers des Nimmervol anhangunden Jnsigeln, dy sy payd daran gehangen habent durch vnser vleizzigen pet willen in allen an schaden. Das geschach nach Christi gepu^ert vber Drewtzehen hundert jar vnd darnach in dem Syben vnd Sybentzkisten Jar an sand Merteinstag.

Source Fulltext: OÖUB 9 (Wien 1906) S. 351-352