Wir Albrecht von Gots gnaden herczog ze Österreich ze Steyr ze Kernden vnd ze Krayn graf ze Tyrol etc. tun kunt für uns vnd vnser erben, daz wir mit fürstleicher betrachtung pilleich haben angesehen, daz bey vnserer vodern zeit die kappell in vnser vest ze Werfenstain gepautt worden ist nicht geweyhet noch auch mit messe vnd andern gotzdinst vncz her nicht ist volpracht noch gestifft worden. Dauon haben wir ze lob dem almechtigen Got ze eren seiner lieben Muter vnd allen seinen heiligen vnd ze merung gotleichs dinst vns vnsern vodern vnd nachkomen vnd allen gelaubigen selen ze trost vnd ze hilf vleizzikleich gedacht ein tegleich ewige messe ze widmen vnd ze stifften in die kappellen der egenanten vnsrer veste vnd sein mit den erbern gaistleichen vnsern lieben andechtigen probst Hainreichen ze Walthausen sand Augustin orden Passawer bischtum dem techant vnd gemainkleich dem conuent doselbs von derselben messe vnd gotzdinst wegen vberainchomen, als hernach geschriben stet zu dem ersten, daz wir zu der pharrkirichen dacz sannd Nicla in dem Struden genant ze Spital, die dy vorgenanten den probst den techant vnd den conuent ze Walthausen angehört, gewidmet vnd gegeben haben sechczehen phunt wienner phenning gelts vmb ein ewige messe, die der egenant probst vnd conuent von der vorgenanten irer pharrkirichen ze Spital in der egenanten vnser kapelln tegleich haben vnd verbesen sullen an vnderlazz, also daz man dem egenanten probst vnd seinem conuent vnd ainem igleichem pharrer ze Spital die vorgenanten sechczehen phunt gelts von allen den nuczen vnd gülten, die zu der egenanten vnser veste ze Werfenstain gehörent, raichen vnd geben sol zu den vier Quatembern im jar zu yeder Quatember vier phunt wienner phenning an alles verczichen, daz si für sich selb vnd für all ir nachchomen sich gegen vns vnd gen allen vnsern erben vnd nachkomen vnd wer ye zu der zeit phleger ze Werfenstain ist mit iren trewn vnd bey irem orden verlübt vnd verpunden haben in der mazze, daz si die vorgenant messe von der egenant irer pharkirichen in der obgenant vnser veste tegleich vnd ewichleich haben vnd verbesen sullen. Si sullen auch mit chelich püchern messgewant noch altartüchern noch allen andern sachen, die zu der egenanten kappelln gehorent, nichts ze schaffen haben, sundern wir sullen das selber alles ausrichten an all ir mue vnd scheden. Es sol auch alles das opher, daz in der egenanten kappelln geuellet, dem pharrer ze Spital geuallen, also daz im seiner pherrllichen rechten nichts enczogen werden an geuer. Sew sullen auch kayner vesper noch ambts im jar in der egenanten kappelln nicht gepunden sein ze singen, den allain zu den zwain tegen, so die egenante kappell geweicht ist vnd an der heiligen tag, in den eren si gestifft ist, so sullen si yedes abents ein vesper vnd an dem tag ein ambt singen. Wann auch daz wer, daz der obgenant probst ze Walthausen oder sein nachkomen oder wer pharrer ze Spital ist die vorgenant messe in der egenanten kappelln tegleich nicht hielten vnd verbesen, als vorgeschriben stet, so sol der purkgraf, der dann ze Werfenstain siczet, darumb manen vnd sullen si denn nach der manung in den negsten vier wochen alles daz erstatten vnd volpringen, daz si an der vorgenanten messe vnd goczdinst versaumbt habent an geuer. Tetten si des nicht, so sol in der purkgraf, der ye zu den zeiten da ist, der vorgenanten gült nicht raichen vnd darczu aller der gult vnd nücz, so zu der egenanten irr pharrkirichen ze Spital gehöret, alsuil niderlegen vncz aislang, daz si alles daz erstattent vnd volpringent, daz si an der vorgenanten messe vnd gotzdinst versaumbt haben an geuer. Wenn aber daz wer, daz ein purkgraf ze Werfenstain, wer der ye zu den zeiten ist, im oder ainem igleichem pharrer ze Spital die vorgenanten sechczehen phunt gelts nicht raicht oder geb zu einer igleichen zeit, als vorgenant ist, so sullen sie noch der pharrer ze Spital derselben messe nicht gepunden sein in dhain weis alslang, vncz daz in der vorgenant gult wider geuelt in dem rechten, als vorgeschriben stet an geuerd. Vnd des ze vrkund geben wir in dysen brief versigelten mit vnserm angehangen insigel, der geben ist nach Christi gepurd drewczehen hundert jar darnach in dem ayns vnd newnczigistem des negsten Freytags vor dem Suntag Jubilate.||
Dominus dux et magister camerae audiuerunt.

Source Fulltext: OÖUB, S. 22-24