Ich Dyetreich in dem Langek in Joriger pharr, die czeit amptman des gotshaus gueter ze Walthausen in dem obern ampt, mein hausfraw vergehen für vns vnd für all vnser eriben an dem offen prief lembtigen vnd kunftigen, daz wir recht vnd redleich an rechter raytung schuldig peliben sein vnd auch sullen gelten dem erwirdigen geistleichen vnserm genedigen lieben hern hern Hainreichen die czeit probst ze Walthausen vnd dem ganczen conuent gemayn daselbs sechczigk phunt wyenner phenning, die ich obgenanter Dyetreich perait ingenomen hab von den holden, di do sind in dem ampt, daz ich inne gehabt hab von meinem egenanten hern vnd auch goczhaus ze Walthausen, vnd für das egenant gelt haben wir in auz aller vnsrer hab zu furphant auzgeczaigt vnd auch czaigen mit dem prief di stuk, di hernach geschriben stent, von erst vnser mul ze Rueczestorf vnd ain wisen in dem Rosental, das alles purkrecht ist von dem egenanten goczhaus ze Walthausen, vnd vnsern czehent in dem Weczel in Joriger pharr, den wir gechauft haben von dem Gästlein ze Newnkirchen, als der chauf prief lawt, vnd vnsern sacz in der Aw in Dunpeker pharr, der vns stet von den Staynern, alz der saczprief lawt. Di vorgenanten stuk vnd gueter haben wir den egenanten hern vnd goczhaus auz aller vnser hab auzgeczaigt mit vnserm gutleichen willen vnd czaigen auch auz mit dem offen prief für das egenant gelt also, ob di obgenant gueter vnd stuk des gelts nicht werd weren, so sullen si das vbrig des egenanten gelts haben auf aller ander vnser hab, di wir haben vnd gewinnenn vnd nach vnserm tod hinder vns lazzen, vor allen andern geltern vnd eriben nichts auzgenomen als lang vnd verr, daz si irs gelts genczleich vnd gar gericht vnd gewert werden angeuär vnd daz ist vnser gutleicher will. Vnd zu einer pezzern sicherhait der obgeschriben sach vnd handel gib ich obgenanter Dyetreich vnd mein hausfraw vnserm egenanten genedigen lieben hern hern Hainreichen di czeit probst ze Walthausen vnd dem ganczen conuent gemain daselbs für vns vnd für all vnser eriben den offen prief pesigelt mit der erbern Jorigen des Tanpeken, Chunraten des Staynner vnd Hannsen des Galgsperger anhangunden jnsigeln, di wir darvmb vleizzikleich gepeten haben, daz si irew jnsigel an den prief gehangen habent in vnd irn eriben an schaden. Der prief ist geben, da man zalt von Christi gepurd drewczehen hundert jar darnach in dem virvndnewnczkisten jar an sand Veytstag.

Source Fulltext: OÖUB 11 (Wien 1983) S. 298-299