In Dei nomine amen. Quoniam secundum apostolum omnes vnum corpus sumus in Christo, debemus caritatis operibus frequenter intendere, ne scindamur ab huius corporis vnitate, que eciam magis pro illis fuerit necessario, qui iam extra statum merendi positi transeuncium penarum subduntur rigori. Proinde ergo nobis Johanni Dei gracia abbati sancti Egidij canonicorum regularium in Witignau ordinis beati Augustini Pragensis diocesis et fratribus nostris utile et salubre uisum fuit, quod pro nostri necnon monasterii in Walthausen preteritorum presencium et futurorum fratribus defunctis suffragia in missis psalmis et oracionibus satisfierent. Quatenus ydem fratres gracia Dei opitulante ad eterna^a) celestia gaudia celerius peruenirent, de fratrum itaque nostrorum necnon reuerendi in Christo patris domini Henrici prepositi monasterii prenominati et conuentus ipsius conniuencia et consensu in domino inter nos fraternitate contracta decreuimus, ut fratres^b) professi vnius uel plurium nostri monasterii siue prefati die obitus intimato psalmi consueti scilicet verba mane^c) etc. in capitulo, lectis uigilijs in choro et in missa defunctorum pro ipsius seu pro ipsorum animabus cantata consequenter quilibet sacerdotum ipso uel alio die legamus^d) unam missam, dyacones uero subdyacones et accoliti vnam quinquagenam^e) psalmorum et fratres conuersi centum oraciones dominicas cum totidem Auemaria explebunt. In die autem anniuersarii psalmi predicti uigilie minores et vna tantum missa sub nota siue conmendacione tenebuntur, nisi quis tunc missam uellet legere specialem, quod non improbamus sed laudamus. Item decreuimus adicientes ad premissa, ut participes efficiamur in vita pariter et in morte missarum oracionum abstinenciarum vigiliarum elemosinarum omniumque bonorum, que in domo uestra sepedicta per presentes uestros diuina dignabitur clemencia operari. In premissorum omnium testimonium nostrum et conuentus nostri sigilla presentibus sunt appensa. Datum et actum in monasterio nostro prefate in Witignau anno domini millesimo trecentesimo nonagesimo sexto, quarta die mensis Junij.

Source Fulltext: OÖUB 11 (Wien 1983) S. 508-509