Bonifacins episcopus servus servorum dei dilectis filiis abbati et conventui monasterii de Cella Angelorum cisterciensis ordinis Pataviensis dioecesis salutem et apostolicam benedictionem. Cum a nobis petitur, quod justum est et honestum iam vigor sequitatis quam ordo exigit rationis, ut per solicitudinem officii nostri ad debitum perducatur effectum. Exhibita siquidem vestra petitio continebat, quod venerabilis frater noster Wernhardus Pataviensis episcopus cupiens terrena in caelestia et transitoria in aeterna felici commercio commutare jus patronatus, quod in ecclesia, quae quondam Engelhartszell ejusque capellis suae dioecesis habebat nec non et quasdam terras vel possessiones et nemora ad eum ratione personae suae spectantia pro suae et parentum suorum animarum salute vobis et monasterio vestro perpetuo liberalitate pia concessit prout in patentibus literis inde confectis episcopi ipsius sigillo munitis plenius dicitur contineri. Nos igitur vestris supplicationibus inclinati, quod super hoc ab eodem episcopo provide factum est, ratum et gratum habentes id authoritate apostolica confirmamus et praesentis scripti patrocinio communimus. Nulli ergo omnium hominum liceat hanc paginam nostrae confirmationis infringere vel ausu temerario contraire. Si quis autem hoc attentare praesumpserit, indignationem omnipotentis dei et beatorum Petri et Pauli apostolorum ejus se noverit incursurum. Datum Romoe apud sanctum Petrum Idus Januarii pontificatus nostri anno primo.

Source Fulltext: OÖUB 6 (Wien 1872), Nr. 10 (Anhang), S. 582f.