Nos Fridericus dei gracia dux Austrioe et Styrioe, dominus Carnioloe, Marchioe ac Portus naonis ad universorum tam presencium quam futurorum noticiam deferimus per presentes, quod viris religiosis Christiano abbate et conventu Celle angelice plantacionis novelle ordinis cysterciensis Pataviensis dyocesis proponentibus nobis suam spe subvencionis inopiam et quam intolerabiles rerum temporalium sustinerent defectus eo quod nondum adeo eidem monasterio foret provisum, ut eciam pretermisso debite hospitalitatis obsequio fratrum ibidem augmento jugi crescencium sustentacioni competenti sue proprie possint sufficere facultates. Nos visceribus pietatis huiuscemodi miserantes miseriam et tante penurie aliquali subsidio succurrere volentes pro dei reverencia et nostrorum progenitorum predecessorum nostrorumque salute memoratis abbati et conventui pro tempore existentibus et dicto monasterio duorum talentorum salis majoris ligaminis et octo talentorum minoris ligaminis semel in anno quolibet deducendi in alveo Eni apud Neuburgam seu Wernstain mutam sive teloneum omnino in perpetuum liberaliter relaxamus et volumus prelibatos abbatem et conventum aut procuratores ipsorum per castellanos vel mutarios dictorum locorum in ipsa libertate nullatenus quibuscunque gravaminibus impediri. Dantes has literas nostro sigillo munitas in testimonium et robur valiturum perpetuo super eo. Datum Patavie anno domini millesimo trecentesimo undecimo XVI. kalendas Maij.

Source Fulltext: OÖUB 6 (Wien 1872), Nr. 51 (Anhang), S. 613