Nos Otto dei gracia Ungarie rex, palatinus comes Reni, dux Bavarie omnibus presencia inspecturis in perpetuum. Aestimantes dignum, ut divine clemencie, que nos in gubernacione temporalium ceteris antetulit, debeamus ex his, que principatui nostro contulit eidem in elemosinarum largicionibus complacere et maxime religiosis personis ordinis cisterciensis in sacre religionis observancia et hospitalitatis omnibus (oneribus?) laudabiliter se exercent; sane ut ecclesia nove plantacionis in Engelcell nostrum defectum, qui temporalibus tantum insistimus, per divinum cultum suppleat, eoncedimus et donamus in nostram quondam charissimi patris fratrum et sororum nostrarum salutem et in remedium progenitorum nostrorum, ut quolibet anno semel per mutas nostras Purchausen videlicet et Scherding duo talenta salis majoris ligaminis et octo minoris dicta ecclesia in Engelcell ducere valeat libere pacifice sine omni exactione mute seu postulacione exeniorum seu donorum juris seu consuetudinis ut (et?) emolumenti cujuscunque quocunque nomine censeatur. Ipse etiam dominus abbas et conventus ejusdem ecclesie pro se suisque successoribus nobis fideliter promiserunt et ad hoc se in eorum consciencias obligarunt, quod singulis annis certo die vigilias et missas pro nobis patre nostro fratribus et sororibus nostris et aliis progenitoribus nostris sollempniter celebrabunt. Ut igitur praemissa perpetua firmitate gaudeant et nulla eis possit oblivio novitari (sic) presentes eis dedimus literas nostri sigilli robore munitas. Datum apud Pataviam anno domini millesimo trecentesimo undecimo proxima sexta feria ante diem palmarum.

Source Fulltext: OÖUB 6 (Wien 1872), Nr. 50 (Anhang), S. 612f.