[28. Juli 1516] Conclusum est422, ut per facultatem adiretur episcopus et idem peteretur pro innovacione privilegii olim reverendissimi domini Pataviensis, et factum est feria secunda post Iacobi hora secunda post meridiem, qua salutatus est idem episcopus Vienensis tali forma ut sequitur:

“Reverendissime Princeps, Pater et Domine graciose. Tota facultas medica coram gracia vestra et reverendissima paternitate hic constituta tanquam vero pastore et ordinario nostro, sciens et per experienciam pro comperto habens, vestram reverendissimam paternitatem singularem esse423tocius ordinis literarum protectorem,defensorem et patronum424, ideo prefata facultas supplex petit, quatenus reverendissima paternitas vestigiis predecessorum suorum inherendo velit privilegium reverendissimi domini Pataviensis, olim ordinarii huius loci, facultati nostre graciose concessum innovare, augere et amplificare, pro qua re tota facultas et singuli doctores offerent operam suam pro conservacione sanitatis corporis gracie vestre semper et commendat se reverendissime paternitati vestre."

Obtinuit facultas innovacionem et amplificacionem dicti privilegii, nihilque idem episcopus pro huiusmodi innovacione a facultate recepit, sed notario dedit facultas pro littera 1 flor. Renens. Item in eadem congregacione dedi de peccunia facultatis pro duabus octavis vini, pro una octava 20 den., facit 10 cruc., 1 cruc. pro pane et piris et 6 den. pro media vini per 12, facit 50 den.