[7. April 1688] II. congregatio 7. Aprilis. Praelectum est decretum regiminis, in quo petebantur medici in Hungariam, Segedinum et in Transylvaniam ad exercitum caesareum medicorum penuria laborantem mittendi cum promisso consueto salario medicis castrensibus debito. Praesentati sunt D. Kremer et Bender.

Obtinui a regimine commissionem, in qua cum D. Festa et Vogl [fol. 70r] aliis ad hoc rogatis comparere nolentibus penes dom. syndicum de contraria parte et dom. Schreyr senatorem me stiti, fuitque post cognitam causae nostrae aequitatem nobis electio data, an velimus duos commissarios ad inventaria consueta pharmacopoliorum struenda mittere sine inercede, an cum intentio nostra eo potissimum collimet, ut qualitatem medicamentorum post mortem possessorum absque periculo deceptionis, quam in vita facile moliri vel abscondendo prava medicamenta vel mutuo accipiendo materialia pharmacopoei possunt, deprehendere quiremus, vellemus visitationem per modum inventurae statim post mortem pharmacopoeorum suscipere ita ut magistratus non posset ante nostram visitationem quidquam tentare aut res visitare aut aestimare eamque visitationem possemus protrahere per quot liberet vel expediret dies omniaque minus sincera composita aut simplicia ante aestimationem civicam ejiceremus. Cumque considerassemus, inventuras civicas plures semper septimanas quandoque etiam menses durare vixque forte qui sine mercede tanto tempore assiderent rerum ponderationibus, aestimationibus etc. ad ratificationem facultatis Interim hoc ultimum eligere visum est, quod cum in hac congregatione facultati proposuissem plerisque quidem non tamen omnibus placuit.

Dom. Andreas Priz et Ernestus Glesler med. bacc. supplicarunt pro materia disputandi pro suprema laurea et obtinuerunt.