[17. Jänner 1701] I. congregatio 17. Januarii 1701 in gratiam collegii pharmaceutici. Causam congregationis movit mihi regimen mediante suo decreto, in quo facta mentio alicujus pharmacopoei seu potius empirici Joannis Georgii Rauhenfelt, qui postquam per alligata sua merita privilegium erigendi in civitate Possoniensi novi alicujus pharmacopolii a sua majestate impetravit, expertus postea hoc suum pharmacopolium noviter erectum nimis sterile sibi esse, per alium supplicem libellum, ut repudiato suo Possoniensi pharmacopolio aliud in suburbiis Viennensibus erigere sibi liceret, imperatorem rogavit. Remisit autem aula hanc ipsius petitionem ad regimen, regimen ad nos et senatum civicum, ab utrisque suam exspectans declarationem. Convocavi collegium pharmaceuticum etiam ad congregationem, utpote quorum causa [fol.160v] negotium potissimum agitur. Comparuerunt ex illo gremio seniores Ginther, Lavin, Ponz et Moni, qui omnes hujus pharmacopoei vitam et mores oretenus ita descripserunt, ut ejus in districtu Viennensi tollerandi spes nulla sit. Eorum scriptam declarationem si obtinuero, ad regimen dirigam.