[30. Oktober 1709] Cum 30. Octobris nobis innotuisset personae medicos lite adhuc in puncto praecedentiae pendente, personae medicos sine praesentia facultatis pharmacopoeam aulicam visitare velle, immediate pharmacopoeo aulico Günther decretum inhibitorium cum addita 100 ducat. mulctae comminatione missum fuit ne hanc visitationem admittat.

Eodemque die consilio intimo memoriale fuit porrectum, in quo demonstravimus, hoc in summum facultatis praejudicium fieri, hinc rogavimus pro subita inhibitione saltem usque ad decisionem litis in puncto praecedentiae ab ipsis intentatae.

Ad hoc a consilio intimo eodem die moratorium per regimen expediendum fuit resolutum, cujus copiam altero die mane a dom. Quarient accepi. Sed cum hoc die hora 2 visitationis tempus constitutum fuisset, summum in mora erat periculum, hinc mane cucurri ad regiminis consiliarium petens consilium ratione moratorii [fol. 224r] expediendi. Hic respondit, memoriale ex cancellaria aulica esse accipiendum et locumtenenti pro celeri expeditione tradendum, sed cum hoc memoriale necdum ad cancellariam devenisset, illud apud dom. Quarient esse sollicitandum, ibidem mihi dicebatur. Dum vero apud illum venissem, dixit dom. Quarient, memoriale jam immediate in cancellariam deportatum fuisse, parum postquam illuc redivissem adferebatur a scriba dom. Quarient et statim expediebatur, pro quo solvi 34 cruc. Deportavi ad locumtenentem in suo horto habitantem sed cum apud aliquam commissionem in Banco esset, illuc ivi et memoriale meum intromisi rogans ob summum in mora periculum citam expeditionem. Locumtenens post aliquam subscriptionem et assignationem cum mandato citae expeditionis per suum famulum illud misit ad regiminis cancellarium, qui illud nonnisi circa vesperum expediri curavit, quo tempore decretum moratorium facultati, dom. Herdodt seniori et dom. Günther missum fuit. Cum ergo facultas de expeditionis tempore in dubio versaretur jamque hora 12. esset audita, ex arena sumpsimus consilium et conclusimus, facultatem eodem tempore cum personae medicis visitare posse. In hunc finem parum ante horam 2. comparuimus, duo prima loca occupaturi exspectantes aulicorum adventum, qui parum post comparebant omnes, cum colera et furore intrantes ad longum et latum nobiscum litigarunt dicentes, se habere mandatum caesareum.

Dum vero illud nobis monstrari cuperemus, responderunt, se hoc habere ex ore caesareo, sed hoc nos credere noluimus, tunc sibi ut viris juratis fidem habendam esse voluerunt, sed cum ad hoc negotium juramentum non deposuerint, nos illud mandatum in scriptis videre voluimus. Cum ergo nihil haberent, interrogabant, an nos aliquid haberemus, quod etiam videre voluerunt. Et dum copiam resolutionis moratorii a consilio intimo emanatam monstraremus, constemati mansuete magis loquebantur sed deinde denuo rixas inceperunt, quibus rectorem nec me a primis sedibus removere potuerunt. Tandem valde irati decedentes iverunt ad aulam ad decumbentem imperatricem, ubi ob injuriam et despectum sibi a facultate illatum magnas fecerunt lamentationes. Intra mediam horam tota aula hisce queremoniis fuit repleta.