[8. Dezember 1712] Ad omnes et singulos perillustres, magnificos, spectabiles, excellentissimos ac clarissimos D. D. inclytae facultatis medicae collegas patronos suos honoratissimos etc. Viennae nunc degentes:

En adjacet decretum originale, quo excelsum Austriae inferioris regimen provide injungit, ut quicunque ex praetitulatis dominis collegis infirmum morbo quodam epidemico laborantem deprehenderit, id statim ad praecavendum amplius malum decenter informet, secus poenas gravissimas ac ipsam sacratissimae caesareae et regiae catholicae majestatis indignationem incursurus, quare ut quilibet tam salubri ordinationi morem debitum gerere ac ab omni comminato dispendio se praecavere valeat, hisce officii mihi incumbentis ratione praefatum decretum modo solito communicandum ac ut id praevia perlectione in testimonium notitiae habitae subscribi velit, singulos officiose requirendos ac una omnes divinae tutelae ex animo commendandos duxi, perseverans Perill. Magn. Spect. Excell. ac Carissimorum D. D. collogarum obsequiosissimus servus Joannes Stephanus Zannutti p. t. decanus.44 Ex aedibus die 8. Decembris 1712. [fol. 272r]

Electio senioris consistorialis loco dom. rectoris. [fol. 272v]

Electus est D. Plömer durante rectoratus ac decanatus tempore. Senior Franciscus de Deimbl videns, se a facultate ab hoc senioratus officio esse exclusum, (acriter enim illud petebat) electionem hanc jam peractam inconvenienter plane debacchatus et protestatus est, sed quia juri suo jam cessisse judicabatur nempe consentiendo primo in electionem novi consistorialis, secundo dando votum Dri Kremer citans pro se statutum universitatis a Ferdinando rege Romanorum, quo praecipitur, ut in casu, quo quispiam trium primariorum professorum senioratum agentium vel rectoris vel decano officio fungatur, senior ejus facultatis per id tantum tempus semper surrogari debeat.45

Protestatio D. de Deimbl furiose plane ac minus convenienter declamata varias ob causas ac ponderosas rationes non fuit suscepta, quo non obstante ad consistorium facto memoriali contra decanum et facultatem appellavit ubi de facto adhuc nihil obtinuit. [fol. 273r]