[14. Juni 1713] XIII. congregatio 14. Junii. Ad potitiones regiminis et consilii sanitatis propositi fuere post spontaneam sui exhibitionem a nobis D. Praun, Caraffa et Nagl ad sese exponendum in lazarethum et ad quaecunque alia loca infecta paratissimi, quos tamen consilium sanitatis (causam quantumvis egregia et capacia subjecta extitissent, scire non potuimus) acceptare non voluit sed novo ac inaudito plane modo nulla facta prius facultati rei communicatione per absolutam quasi potentiam praestantiora ejusdem facultatis commembra voluit seligere sortisque discretioni ac ludibrio eadem committere in lazarethum dein vi amandanda. Quo a me percepto facta prius contra hoc inconveniens utpote non necessarium [fol. 311r] nunquam passim practicatum sortilegium coram memorato sanitatis consilio solemnissima protestatione eodem quasi momento imperatorem, mediante clementissime illico concessa audientia accessi illique violentiam a sanitatis consilio praestantioribus facultatis commembris per hoc sortilegium in lazarethum mittendi illatam exponendo, nullamque per sortem cogendo ad lazarethum membra utpote pluribus existentibus medicis sponte sua ad exponendum sese offerentibus necessitatem esse ostondendo, aliisque tantis actualibus solidis rationibus persuadendo, id tandem obtinui ut immediate sequenti die per expressum decretum aulicum dictum sortilegium a sanitatis consilio sine necessitate inventum Caesar annullaverit et libertatem sese exponendi seposita omni violentia dicto consilio unicuique servandam serio imposuerit.

Intimaveram facultati qualiter a rectore fuerim rogatus, ut ego fungar coram imperatore in solemni crastina corporis Christi processione officio rectoris, quapropter necessum esse alium collegam habere, qui fungatur officio decani et fuit electus D. Plömer exdecanus.

Cum autem consistorium vidisset, quod ego propter alias publicas easque solemnes functiones uti sunt in festis paschatis, pentecostes, S. Ivonis etc. apud S. Stephanum ut rector etiam hanc in festo corporis Christi caeteris valde solemniorem imo solemnissimam peregissem nec non per tot hujus anni menses in consistorio expediendis universitatis negotiis assidue praesedissem, voluit proinde et quidem invito me titulo magnifici perpetuo donare ac ab omnibus tum scripto tum voce pro tali haberi debere.

Peracta uti superius jam scriptum trium cadaverum exenteratione, cui assistere voluit perceptis prius 500 flor. D. Valentinus Gorgius, petiit instanter suscipi ad gremium facultatis, alias dicit, illum non posse stare promissis facultati praeter cadaverum exenterationem de expositione in lazarethum sancte factis. Quo percepto voluit facultas D. Gorgio satisfacore illumque ad actum repetitionis admittere proponendo illi casum practicum et assignando aphor. 9 sect. II. et quidem sine juribus cum hac denuo illi imposita conditione ut quaqua data sese in futurum exponendi tum ad lazarethum vel quemque alium locum infectum occasione officium loimici suscipiat. Quod si non fecerit, [fol. 311v] hanc susceptionem esse nullam, quam si validare contenderet, solutione tamen jurium integrorum candem validabit. Quae cum omnia approbasset, post aliquot dies una cum D. Löw pariter extrafacultista ad consilium sanitatis fuit missus dein in lazarethum exponendus.