Nos Albertus Dei gracia Chyemensis ecclesie Episcopus recognoscimus et presentibus profitemur, quod ad requisicionem reuerendi in Christo patris et domini, domini Wichardi sancte Salzburgensis ecclesie Archiepiscopi, apostolice Sedis Legati, pro necessitatibus sibi et ecclesie sue imminentibus, ex concessione gracie per Sedem apostolicam sibi facta, consensimus, annuimus, et permisimus de nostra bona et libera voluntate, vt idem dominus Wichardus Archiepiscopus de beneficiis nostre dyocesis. quorum patronus est, ad suam presentationem spectantibus, quamprimum ea, vel quodcunque ipsorum vacare contigerit, valeat ac debeat fructus percipere primi anni. In cuius rei testimonium presentes litteras sibi dedimus, nostri sigilli robore communitas. Datum Salzburge Anno Domini Millesimo trecentesimo terciodecimo, in die beate Margarete virginis et martiris gloriose.

Source Fulltext: DOPPLER