Ich Hainrich Smid purger ze Chiczpüchel tun Chunt allen den die disen brief sehent oder hörent lesen. Daz ich mein Haus auf der Chugelstat ¹⁾ ze Chiczpüchel ze naeste pei der Chirichen daz ich von niuwen dingen mit meiner Selben Chost vnd Arbait gezimert han. dem selben vorgenanten goczhaus vnd dem pfarrer ²⁾ swer danne ist gegeben Han vnd div hofstat vnd den Garten der da zuo gehoret z Selgraet für mich vnd mein hausfrawen Alhaiden vnd han im ez auf gegeben dem Goczhaus von Pabenberg ³⁾ von danne ich ez het zelechen in Vlriches von Münchawe vnd in dez selben Goczhaus amptemannes Hand Ortelibes von Ekking ⁴⁾ die sein sullen dez selben vorgenanten Goczhaus von Chiczpüchel vnd dez pharreres Trager vncz im die aigenschaft werd erwarwen an allen schaden vnd daz staet belibe gib ich disen brief mit meinem Ingesigel veruestent Do man zalt von Christes geburt Tausend Iar Drew Hundert Iar Dar nach in dem vierzehenten Iar an sant Scolastican tach Dez sint zwg bruder Friderich von Ratenhasloch ⁵⁾ vnd Hrn Ludweich vnd Hrn Wernher Drei Erbaer Prister vnd Dauit der Rihter ze Chiczpüchel vnd Vlrich von Münchawe Ortlieb von Ekking vnd Vasold von Parmen ⁶⁾ otto Serauter Hainrich der Talaer vnd ander Erbaer lawt.

Source Fulltext: DOPPLER