Ich Hainrich Pfarrer von Stuluelden vergich an disem brief allen den di disen brief lesend oder horent lesen daz ich vnd alle mein noch chomen des Phinztages in der Ersten vastwochen Iericleichen ein Messe haben schulen ze vtendorf vmb Alheit die Wüfin vnd vmb alle ir vodern vnd noch chomen vnd dor vmb hat si geschaft daz Hauz daz da stet auf der gemain¹⁾ vnd ir gewesen ist iericleichen mit dreisich Phenninge vnd schol di selben Phenninge Fridrich ir Sun oder sein erben alle iar an irem iartag geben. beten si des niht so schol das selbe Hauz dem Pharrer der denne ist ledich sein an allen chriech vnd zv dem selbem gelub vnd gewerft ze pehalten ewicleich pint sich Fridrich ir Svn vnd sein erben mit seim Insigel an diesen brief. dar zv gib ich an disem brief mein Insigel ze einer stetigunge der vodern gelub. vnd sint des geziwg Her Chvnrat vnd Her Niclo gesellen ze Stvluelden Her Fridrich der der vreithof Reiter²⁾ Fridrich der Lopech³⁾ Chvn von Swarzenpach⁴⁾ Liebhart der Schvzze⁵⁾ Andre von dem Marcht⁶⁾ Arnolt der Chotmersperger Ulrich der Chotmesperger vnd ander vrumer levt genvnch daz ist geschehen do von christes purt ergangen woren driwzehenhvndert iar an dem zweinzigisten iar.

Source Fulltext: DOPPLER