Ich Weichart der Payer von Stad meins Herren dez Aptez von Agmund vnd dez Confentez Amptman vnd phleger. vergich offenwar mit disem prief allen den di in an sehent oder horent lesen vmb zway guet di gelegen sind in dem Pangew ob Sand Feitt der ains haist dacz pucheln dez zway phunt geltez daz dewselben zway guetel Martein der Speher Purger ze Salzburch sein Haeusvraew vnd ir Eriben gechauft habent von Chuenraten dem Gaerren pey der Ens vnd von Luzein seiner Haeusvraeun vnd habent mir di selben zway guet der vor benant Chuenrat vnd sein Haeusvraew Luzey vnd Haertneid vnd Durinch di Schermperger mit gueten willen aufgeben di sew von meinem Herren vnd von mir zelehen habent gehabt vnd han ich nu mit ir aller guten willen vnd nach ir vleizzigen pet dew vorbenanten zway guet mit allew dem vnd darzue gehort dem ebenanten Martein dem Speher vnd seinen Chinden verlihen ze rechtem lehen als meins Her von Agmunde lehenschaft vnd zinslehen recht ist angever. dar vber zve ainer zeunuzze vnd zve ainem waren vrchunde gib ich in disen meinen offen prief besigelten mit meinem anhangunten Insigel der gegeben ist dez naehsten Mantagez vor Sand Georii Tag do ergangen waren von Christez gepurde Drewzehenhundert Iar vnd in dem Syben vnd Dreizgisten Iar.

Source Fulltext: DOPPLER