Fridericus dei gracia sancte Salzburgensis Ecclesie Archiepiscopus Apostolice Sedis Legatus Dilectis in Christo. Gerhocho de Radekk¹⁾. Wulfingo de Leybencz.²⁾ Heinrico de Chunigswisen³⁾. Friderico. Jacobo. Helmwico. Johanni. Lodewico.. ad sanctum Vdalricum extra muros Noueciuitatis,⁴⁾ in Capella⁵⁾, in Müldorf. in Altenmüldorf. in Tauffchirchen. in Vogano,⁶⁾ in Chatsch.⁷⁾ in Mettenhaim,⁸⁾ in Treuen.⁹⁾ Ecclesiarum Rectoribus, salutem in domino. Magister Heinricus de Leyzz¹⁰⁾. Custos et Canonicus ac Collector fructuum fabrice ecclesie nostre predicte. nostris auribus intimauit. quod vos suscepte liberalitatis inmemores. fructus primi anni de beneficiis vobis per nos collatis. fabrice nostre Metropolitane ecclesie legittima reseruacione debitos, pluries et legittime moniti, hucusque cum graui dicte fabrice dispendio soluere neglexistis. Volentes igitur indempnitati supradicte fabrice quantum in nobis est precauere, vobis omnibus et singulis qui per presentes fueritis requisiti in virtute sancte obediencie, et sub excommunicacionis pena, quam exnunc prout extunc in vos, et vestrum quemlibet ferimus in hiis scriptis, si non feceritis quod mandatur, iniungimus, et mandamus. Quatenus infra Quindecim dies a recepcione presencium conputandos. quorum quinque pro primo, quinque pro secundo, reliquos vero quinque pro tercio et peremptorio termino et monicione canonica assignamus. cum supradicto Collectore super premissis fructibus, seu partibus aut porcionibus vos, aut vestrum quemlibet contingentibus amicabiliter componatis. Alioquin contra non parentes mandatis huiusmodi iuxta modum rebellionis eorum. acrius procedemus. Datum Salzburge Idus Octobris. Anno domini Millesimo. ccc^mo Tricesimo Septimo.

Source Fulltext: DOPPLER