In Christi nomine Amen. Ortolfus¹⁾ dei gracia Prepositus et Archidiaconus Pilgrimus²⁾ Decanus totumque Capitulum Ecclesie Salzburgensis ad perpetuam rei memoriam Quociens a nobis petitur, quod religioni et deuocioni dinoscitur conuenire animo nos decet libenti concedere et petencium desideriis congruum suffragium impertiri. Eapropter reuerendi patris domini Chunradi Venerabilis Ecclesie Chiemensis Episcopi iustis et deuotis postulacionibus annuentes Promittimus pro nobis ac successoribus nostris, diem aniuersarii sui et predecessorum suorum cum vesperis vigiliis maioribus missa defunctorum candelis et pulsacione Campanarum infra Octauas Assumpcionis beate Marie virginis, annis singulis deuote peragere, quemadmodum pro aliis prelatis Archiepiscopis, et Episcopis in perpetuum fieri consweuit Et quia pium et sanctum est illos consequi stipendium, qui pro tempore suum comodare reperiuntur obsequium. Supradictus dominus Episcopus sanus corpore, sciens se tamen mortalitati subiectum, et quandoque necessario moriturum infrascriptum predium. non ad Dominicalia Episcopatus Chiemensis Ecclesie aut ad communem mensam Episcopi pertinens. sed cum bonis per suam industriam conquisitis conparatum, dedit, obtulit. et tradidit iure proprietatis inperpetuum liberam ab omni iure aduocali cum suis iuribus et pertinenciis vniuersis, ad Oblagiam sev communem mensam nostram Canonicorum Ecclesie Salzburgensis. Est autem predium hoc situm in Achtal in Parrochia sancti Viti prope Castrum Goldekk. et seruit denariorum Salzburgensium solidos septem minus denariis quinque Silige modios duos mensuras duas Auene modios tres In institucione denarios decem. in pascha agnum vnum et Oua triginta. Et iam dicti redditus debent diuidi et communiter distribui inter Canonicos eodem die, quo dicti domini Episcopi exequie peraguntur. Et hanc donacionem prefatus dominus Episcopus promisit non rouocare vel in vita vel in morte neque racione ingratitudinis immo promisit pro se ac suis successoribus firmam ac ratam irreuocabiliter permansuram. In quorum omnium testimonium et certitudinem pleniorem presentes mandauimus fieri litteras appenssionibus Sigillorum nostrorum prepositi et Capituli roboratas. Datum et actum in Capitulo nostro Salzburge Anno domini Millesimo ccc. Quadragesimo Tercio iiii Kalendas Augusti.

Source Fulltext: DOPPLER