Ich Sigloch ¹⁾ an der Prukke Schefherr datz lauffen vergich offenbar mit disem brief vnd tuen chunt aln den die in sehent horent oder lesent daz ich mit wolbedachtem muet vnd mit guetleichem wiln ze der zeit do ich ez wol getuen möht geben geaigent vnd geschaft han vnser Vrowe hincz der Phar datz lauffen Nevnczehen phunt gelts die gelegen sind auf dem vrbar vnd purchreht vnd auf dem gueten die hernach geshriben stend die ich allev hincz derselben pharr geben han für ein vreyz ledigz aygen nach meinem töd also ob ich sev vor notdurft vberhaben mag vnd ob ich an Erbe verfar mit der beschaiden daz der pharrer selb nevnt priester sein sol vnd sol mir vnd aln meinen vodern ein ewigev messe gehabt werden datz der egenanten pharr. an dem montag sol man sei singen dacz sand Michel auf dem Charner ²⁾. die andern tag alle sol man sev sprechen dacz sand Margareten vnd sol man alleweg ze der selben messe swenn man den antlaz chunt. XL tag die mein herr von Salczburg darzuegeben hat mein vnd meiner vodern gedenchen vnd offenlich vmb vns pitten. Ez sol auch ein isleich pharrer ewichleich zwir in dem Iar an sand Avgustins tag vnd an dem tag vnd ich stirb ewichleich mier vnd meiner hausfrovn vnd aln meinen vodern. vnsern iartag begen. mit vigili mit selmesse mit geleutt als gebönleich ist in der vorgenanten pharr. vnd shuln an dem selben tag die priester alle messe haben die vor ehafter irrung mügen. Vnd sol ein isleich pharrer ewichleich alle Iar geben den herren in die gemain zway phunt phenning alle quatemper ein halbz phunt salczburger phening also daz in von den zwain phunden ander nütz den sev emaln gehabt habent niht geminnert werd. Es sol auch die vorgenant messe alle tag gehabt werden die weil man Preym ³⁾ levtt. ez sey danne daz man sev vor oder nach haben muezz an einem hochzeitleichem tag oder swenn ein leich da wer oder von andern sachen da von man sey muest vor oder nach haben. Ez sol auch die selb messe ewichleich alle tag gehabt werden an vnderlaz vnd an alle saumung ob halt der Pan auf daz lant gelegt würd so sol man sey dannoch haben mit versparter tür. Wer aver daz der pharrer dor an savmig wer vnd allez daz daz oben geshriben stet niht genczleich volfueret. so schuln mein nachkomen vnd die genanten von der stat mit sampt dem Rihter die selbe säumung an gefer pringen an den Techant von Salczburg. vnd sol der danne den pharrer dor vmb pezzern. vnd vndersten daz ez niht mer geshech. Ich han auch meinen herren von Salczburg gepeten mit sampt herrn Heinreichen von Nuzdorf do selbs pharrer dacz der egenanten pharr dacz lauffen daz er daz gesheft bestätigt hat mit seinem brief. Daz sind die gueter vnd daz vrbar die ich egenanter Sygloch geben han hincz der egenanten pharr dacz lauffen. Ein swaig in der Castevn ze Iukawe ⁴⁾ in Castevner geriht. Ein guet haizt dacz den holczen ⁵⁾. Ein Hueb ze Oberhevning ⁶⁾. Ein Mül haizt Specht ⁷⁾ pei der vnferzach ⁸⁾. Ein guet haizt Heczling. Ein guet ze Puetling ⁹⁾. Ein hueb ze Hausmarninge ¹⁰⁾. Ein hueb ze Chnoczing ¹¹⁾. Ein guet ze Aglazzing ¹²⁾. So ist daz daz purchreht die halb hütl in der altach ¹³⁾. einen garten vnter den lederern. einen garten in dem wagner winchel. einen garten auf dem graben vor dem tor, einen prottisch in der stat. alle dev hofstet die ich han in der altach. vnd ein halbe hofstat ze obslauffen ¹⁴⁾ do ist p´enichel aufgesezzen. den nidern haken niderhalb des graben. vnd zwo pevnt die dar zue gehörnt. mit allem dem daz anders zue demselben haken gehört versueht vnd vnuersueht. Ich han auch den selben haken geben zue der egenanten pharr mit der beschaiden. daz dhain pharrer des holtzs iht verchauffen sol noch ze fremder hant iht anwerden sol. denn swaz er sein bedarf zue den vier gotshäusern hincz der pharr hincz sand michel ¹⁵⁾ hincz sand peter ¹⁶⁾ hincz sand nicla ¹⁷⁾ vnd zue den gueten die ich zue der egenanten pharr geben han vnd zue anderm seinen purchreht Ich han ouch die vorgenanten guet alle geben zu der vorgenanten pharr mit aln den nützen vnd gesuechen die dor zue gehörnt versueht vnd vnuersueht für ein vreyz ledigz aigen. Vnd daz disev sache vnd daz gesheft also stät vnd vnzerbrochen beleib gib ich egenanter Sygloch disen offen brief versigelt mit meinem anhangundem Insigel vnd mit meiner lieben frewnd anhangunden insigeln Fridreichs von teysing ze den selben zeiten rihter ze lauffen vnd mit Chunrat des sheller die irev insigel dor an gelegt habent durch meiner pet wiln in an allen shaden Der brief ist geben nach Christi gepurd dreuczehen hundert iar vnd in dem drev vierczikistem Iar an Sand Egidij tag.

Source Fulltext: DOPPLER