Ich Rudolf der Sneider Purger ze Mittersil vnd mein hawsfraw. Lutzey vnd vnser Erben. Fridreich. vnd Iohans. vnd vnser tochter Chunigundt vnd alle vnser erben die wir izund haben oder noch gewinnen veriehen offenleichen an disem prief. vnd tun chund allen den di in sehent oder hörent lesent. Daz wir mit gutem willen vnd mit verdachtem mut. vnd mit vnserr freunt rat. dem erbern Hern Hern Hertneyden. pharrer ze Stuluelden. vnd allen sein nach chomen. vnd seinem gotshaws daselben ze Chawffen. haben geben vnser Aygen den ich vorgenanten. Lutzey. zu meinem wirt. dem vorgenanten Rudolffen pracht han. Ein Hof Stat, vnd ein gartten leitt pey dem freythof ze Mittersil vnd fumf Agcher. ligent in dem marchtvelt. vnd drey dristall. ligent auf dem wazzeruall in der Felben mit allen den rechten vnd nutzen die dar zu gehorent beschuocht vnd unbeschuocht. vnd hat vns dar vmb geben vier vnd zwaintzig phunt Salzburger phenning. Vnd schullen auch wir in daz aygen machen als lantz recht vnd aigens recht ist vnd gewonhaitt. vnd hat auch vns der vorgenanten phenning gericht vnd gewerd gar vnd gäntzleichen. vnd schullen auch wir ir dez vorgenanten aygens ir gewer vnd ir furstant sein an aller der stat swo in des not durft geschicht Täten wir des nicht. Wettan schaden er vnd sein nach chomen vnd sein gotshaws nämen. daz schullen si haben daß vnsern trewn. vnd auf aller vnserr habe. swa wir den haben. oder noch gewinnen. Der tayding sind zeug. Herr Iohans. geselle zu Stuluelden. vnd Her Symon. vnd Heinrich. die auch gesellen waren. ze den zeytten da selben. Seybot. der Plümberger. Ott. der Sayler purger ze Salzburch. Hawg von Hertweisdorf. Fridreich der Chyrchpuchler. des Chellners schreiber ze Stuluelden. Heinrich der Riß. purger zu Mittersil. vnd ander erberig läut genuog. daz in daz alles stät vnd vnzebrochen von vns peleib. dar ober geben wir in disen Offen prief versigelt mit Hern Heinreichs von Velben. der den zeitten vnsers Hern von Salzburch marschalich. vnd auch purchgraue ze Mittersil waz. vnd mit Vlreichs. vnsers Hern von Salzburch Chellner ze Mittersil waz mit ir payder anhangenden Insigeln. die iren insigel an den prief gelegt habent durch unserr pet willen in an allen schaden. Wnd werpint wir vns vnder den vorgenanten Insigel mit unsern trewn stät vnd vnzebrochen ze pehalten alles daz. daz oben an disem prief verschriben ist. an alles geuer. Als ob vnser selber insigel dar an läg. Der prief ist geben dan man zalt von Christ gepurt Dreutzehenhundert Iar dar nach in dem fier vnd fiertzikistem Iar. An sand Symonis vnd Iudas tag.

Source Fulltext: DOPPLER