Ich Iacob. vnd ich Ians. vnd ich Margret Christans dez Oeder Chinder, wir vergehen offenbar an disem brief, für vns vnd für all vnser Erben. Daz wir willichleich vnd nach besunderm rat vnserr pesten vnd nachstem frevnt, geben haben vnser frawen Chirichen ze Stvluelden daz gut ze Schattaw,¹⁾ daz vnser rechts aygen ist gewesen durch vnsers vorgnanten Vater vnd vnserr muter sel willen den got gnad, mit so getaner beschaiden, daz daz selb gut ze Schattaw dem Pfarrer ze Stvluelden ewichlich sol dienen mit allen den nutzen vnd rechten besuchten vnd vnbesuchten, wie si da zv gehorent, vnd wie di genant sint, vnd haben auch vns vnd all vnser erben dar auf verzigen, aller ansprach vnd recht, dar vmb daz vnserr vorgnanten vodern gedacht sol werden auf dem Leker,²⁾ vnd alswo, in aller der mazz als anderr erberr levt, di daz vorgnant Gotzhaus ze Stvluelden gewidemt, vnd mit dienten gvten begabt habent. Waer auer. daz wir eder vnser Erben, dem egnanten Gotzhaus das vorgnant gvt ze Schattaw widerlegten, mit ainem andern gvt, daz iem als uvtz vnd als gelegen waer, als daz, dez sol vns der Pfarrer stat tun, an aller widerred. Auch vergehen wir, daz wir, noch dhain vnser Erib, der in der Pfarr ze Stuluelden gesezzen ist eder hauslich wonent ist, dhain begrebnuzz im sol nemen gen Holerspach eder alswo, an dez Pfarrer willen von Stvluelden. Darvber ze einem vrchvnd der wahrheit gewen wir in disen offen brief, mit vnsers lieben Vettern hern Nyclas dez Holerspechen, vnd vnsers lieben Ohaim, Christans des Frieschaer, anhangenden Insigeln, di si durch vnserr pet willen daran gehangen habent in an schaden, wan wir aigner Insigel nicht haben. Der brief ist gewen do von Christes purt waren ergangen dreutzehen Hundert Iar dar nach in dem Acht vnd viertzgisten Iar an dem Liechtmißtag.

Source Fulltext: DOPPLER