Ich Marchart von Pründling. vnd mein hausfrawe. vnd alle vnser Erben. sün vnd töchter. veriehen offenbar mit disem prief vnd tuon chunt alle den di in an sehent hörnt oder lesent. Daz wir mit wolbedahtem muot. Rehtlich Redlich. ze Chauffen geben haben. Haidenreichen von Cell. seiner hausfrawen. vnd allen iern Erben sünen vnd töchtern Ain guot. das rehtes aigen ist. das gehaizzen ist. vngehaewernmos. ¹⁾ gelegen in der Rauris besuochts vnd vnbesuochts mit allen den Rehten vnd nützen. die darzuo gehörnt. vnd also wir sew inne gehabt haben. vnd was sew vns dar vmb ze geben verheizzen habent. des habent si vns gar vnd gaentzleich verricht vnd gewert. wir schüllen auch des voruerschriben aigens. ze vngehaewernmos ir gewer vnd fürstant sein. an alle der stat. woe in des not vnd durft geschicht. als aigens vnd des landes reht ist. an geuerd. wir süllen auch fürbas auf das voruerschriben aigen nimmer dehein ansprach nicht haben weder mit Reht noch anreht. weder mit worten noch mit werchen. Taet wir des nicht naemen sie des deheinen schaden. den si bei iern trewen gesprechen möhten an aide. den selben schaden schüllen wir in abtuon. vnd schüllen si den haben auf vnsern trewn. vnd auf allerr vnserr hab. Das in das staet vnd vnzerprochen von vns peleib. dar vber geben wir in disen prief versigelt mit mein egenantz Marcharts anhangundem Insigel. dar vnder ich mich sein hausfrawe vnd sein erben verpinde alles das staet ze haben das verschriben stet. Datum Anno domini Millesimo. ccc ^o. xlviij ^o. in vigilia sancti Augustini.

Source Fulltext: DOPPLER