Ich Vlrich, Chellner ze Mittersil vnd mein Hawsfraw, Magret, vnd vnser erben, vnd alle vnser nach chomen veriehen offenleichen an disem prief vnd tun chund allen den die in ansehent eder hörent lesen. Daz wir mit gutem willen vnd mit verdachtem mut durch vnserr Sel willen vnd durch vnserr voruadern Sel willen, vnd auch durch vnser Sel tactnuzze willen geben vnd auch gemacht haben pey vnserm lemtigem leib, vnd tuo wir iz wol getun machten vnser vrawn gen Stuluelden zu irem liecht in ir gotshaws für irn alter vnsren aygnen häwsser den wir haben gehabt ze Stuluelden. Ays in dem dorf da der Slacher in ist, vnd dient fumf vnd Subentzig phenning iarchleichen, vnd ays ze Mittersil daz Turnll. an der prugken. da der Schuochel in ist. Und den chasten dar vnder, vnd den Stal dar pey, vnd dient drey schilling phenning iarchleichen, vnd den Hawstat vnd den chawf da des Tanderlier haws auf stet an der prukgen vnd dient drey schilling phenning iarchleichen, vnd ein weyssait von seinen trewen swer den hawstat vnd den chawf inne hat. vnd schol auch für das weissait geuallen phenning daz pilleich vnd recht ist. vnd schullen die gelegt werden zu anderm gelt. vnd darzu die garten die ze recht dar zu gehorent vnd alles daz, daz ze recht zu den vorgenanten häwssern gehoert, vnd zu der hawstat besuoecht vnd vnbesuocht mit allen den rechten vnd nutzen vnd dar zu gehoerent. Vnd insogetaner beschaydenhait daz dem pfarrer ze Stuluelden alle iar. der dienst der von den vorgenanten hawssern vnd hawstat vnd auch chawf gehort iarchleichen schol geuallen an sant Oswaltztag an allen schaden und an alles verziehen. vnd schol auch der pfarrer vollen gewalt haben ze pestiften vnd ze entstiften deu vorgenanten häwsser an allen chrieg. vnd swer vnser vrawn zehenmeister ist vnd irs gotzhaws dem schol alle iar geuallen von dem allem. von dem pfarrer der sein innimer ist vierdhalben schilling phenning. vnser vrawn zu irm liecht an allen chrieg vnd an alles verziehen. Vnd dem pfarrer schullen peleiben. drei schilling pfenning iarchleichen. daz er alle iar. vnd ewichleichen vnsern iartag vnd vnserr voruadern iartag schol pegen an sand Iohanstag nach Ostern. mit der Vigilii vnd mit den messen als gewonleich vnd sitleich ist. vnd den drin herren seinen gesellen schol geuallen all iar. ie dem herren. fumftzehen phenning. daz si vmb vns pitten. vnd dem mesner fumf phenning daz der läut zu der Vigilii. vnd zehen phenning zu den toeten chertzen daz man vns die dan auf zunden schol dez abentz vnd des morgens. Waer auer daz der pfarrer saumig dar an vär vnd iz verziehen wolt eder verzug daz vnser vrawn daz nicht widerfür alle iar als vor verschriben ist vnd auch sein herren vnd dem mesner, so habent die zehenmaister. vnd die pfarlaüt vollen gewalt den zinß ze nemen allen daz iar vnd ze geben armen laüt durch vnserr Sel willen. daz iar. vnd schullen auch des von dem pfarrer vnd von sein gesellen vnengolten peleiben vor allen rechten. Vnd haben auch sich der vorgenanten pfenning verzigen daz iar gantz vnd gar. an allen chrieg. Daz daz stät vnd vnzebrochen peleiben von vns vnd von allen vnsern erben dar vber geben wir disen offen prief versigelt mit vnserm anhangunden Insigel vnd mit des erbern Ritter her Nyclas. des holerspech. anhangunden insigel. Im an allen schaden. vnd dar vnder wir vns verpintten mit vnsern trewen. wand er vns gelichen hat durch vnserr payder pett willen. vnd daz ze volfuoren vnd stät zepehalten daz vor verschriben ist. Der prief ist geben duo man zalt von Christ gepurt Dreutzehenhundert Iar dar nach in dem Naün vnd viertzikistem iar. des nächsten Suntags vor Sand Pauls tag. Als er becherd ward.

Source Fulltext: DOPPLER