Ich Eberhart der Velber vergich Offenbar an disem prief für mich vnd für all mein Erben vnd tun chunt allen den die disen prief ansehent oder hörent lesen. Daz ich mit gütem willen vnd mit verdachtem müt alle die Tadinch die mein Prüder Hainrich der Velber getan hat mit Elspeten Hainrichs Hausfraun vnder den Penchen vmb daz Güt ze Oberndorf. daz er ir für ein Rechcz ledigs Aygen Geben hat daz daz mein güt will ist vnd schol ich auch des Gucz mit sant meinem Prüder ir gewer sein ein aller der mazz als si prief von meinem Prüder hat vnd als des lancz vnd Rechcz Aygens Recht ist. Tat ich des nicht näm si oder ir Erben des chainen schaden wie der genant wär oder wie si den nam den schol ich in ab tün vnd schol si den haben auf aller meiner hab auf läuten vnd auf Güten Daz in daz also stat beleib, dar vber ze ainem vrchund gib in disen offen prief versigelt vnder meinem anhangenden Insigel. da ich mich vnder verpind mit meinen treun alles daz stat ze haben vnd ze volfuren waz vor geschriben stet. Der Tading sind Zeug Iörg der Sneller Partel der Swap Hainrich der Mäusel. vnd ander Erberg läut genug. Datum Anno domini M^o. ccc^o xlviiii^o in die sancti Georii.

Source Fulltext: DOPPLER