Ich Hainrich der Velbar vnd mein Hausfraw wir vergehen Offenbar an disem prief für vns vnd für all vnser Erben vnd tun chunt allen den di disen prief ansehent oder horent lesen daz wir mit Gutem willen vnd mit verdachtem mut ze Chauffen geben haben Elspeten Hainreichs Hausfraw vnder den Penchen purger ze Chiczpühel. vnd allen iren Erben Vnser Gut dacz Oberndorf. daz da leit ze Niderist ein dem Dorf. besucht vnd vnbesucht mit allen den Nuczen vnd Rechten di da zu gehörent Wie die genant sind. für ein Rechcz ledigs Aygen. Vmb Dreu vnd Vierczich phunt phenning ie ainen Chräuczer für drei phenning der wir gar vnd gancz gericht vnd gewert sein. Wir schullen auch des vor genanten Gücz ir Recht gewern sein für vnsern Prüder Herrn Eberharten den Velber vnd für all die die durich Recht daz Gut Erben scholten vnd für all Läut an aller der stat vnd si sein bedurfent wo in des not geschicht als des lancz vnd Rechcz Aygens Recht ist. Tät wir des nicht namen si des chainen schaden wie der genant war oder wie si den namen. den schullen wir in ab tun gar vnd gancz vnberet vnd vnbeflecht iren Sinn ze gelauben angeuer. vnd dar vmb haben wir in ze Rechtem fürphant geseczt vnsern Zehent an dem Astperig ein Chiczpüchler gericht. War auch daz in chain Chrieg oder Stoz cham ein daz vorgenant fürphant daz in daz nicht Richtig wär Namen si des chainen schaden den schullen si haben auf vns vnd auf aller vnser hab auf läut vnd auf Gut vncz daz si schadens vnd Hauptguez gar vnd gancz verricht vnd gewert werden. Daz in daz so stat beleib dar vber ze einem Vrchund geben wir in disen Offen prief. versigelt vnder meinem vorgenanten Hainrich des Velber Insigel. an dem prief hangent da wir vns vnder verpinden mit vnsern treun alles daz stat ze haben vnd ze volfüren waz vör geschriben stet. Der Tading sind Zeug Vlreich der Schöhouer Chünrat Rüdlant Dietreich der Schaflüczel. vnd ander Erberg laut genüg. Datum Anno domini M^o. ccc^o xlviiii^o In die sancti Georii.

Source Fulltext: DOPPLER