Ich chunrat der wach vergich für mich vnd für mein hausfrawn. vnd für all vnser erben. offenleich an disem brief, daz ich mit gutem willen vnd mit verdachtem mut. vnd nach meiner freunt Rat. gemacht vnd geschaft han. zehen schilling phenning. Iarleichs geltz auf meinem tail. ze prachouen¹⁾ vnd auf lakchen²⁾, mir vnd meiner hausfrawn vnd vnsern vodern zu ainem ewigen iartag. also mit der beschaidenhait. daz meinev chind. vnsern iartag Iarchleich begen schullen. auf aller heyligen tag, mit den vorgenanten zehen schilling phenning. vnd ob si dar an saumikg warn. daz si dez nicht taten, so hat der chirchprobst swer dann dez gotzhaus phleger ze chitzpühel ist. vollen gwalt. den vorgenanten dienst in ze nemen. vnd vnsern iartag do von begen Iärchleich. als vor geschriben ist. vnd dar vber ze vrchund der warhait. verpind ich mich vnder Dietrich Schaflützels hangenden Insygel im an schaden wan ich nicht selber Insygels han. Dez sind zeug, Empel ab der prukgen. Haintz der Meylinger. chuntzel der Scheftler vnd ander erberg laut genug. Datum Anno domini Millesimo. ccc. l^mo proxima dominica feria ante Kathedra petri.

Source Fulltext: DOPPLER