Ich Hainrich der Schuchster puriger ze Salczburg vnd mein hausvrau vnd all vnser erben veriehen für vns vnd für vnser nachchomen vnd tun chunt offenbar mit disem prief allen den di in sehent oder horent lesen. Vmb vnser haus vnd hofstat daz gelegen ist oberhalb des Oster Tor ¹⁾ zenachst an des holfuoz haus vnd daz weilant vnd e gewesen ist des Glidweichs vnd da ewichleich aufleit Iarchleich hincz vnser vrawen gein der pfarr Sechszig pfenning vor allen lauten vnd gelten Also mit der beschaidenhait daz wir von dem selben haus vnd hofstat als di weil vnd wir daz inne haben oder wer es nach vns inne hat oder besiczet all Iar Iarchleich dienen vnd geben schullen auf sant Rudprechcz tag in dem herbst dem zechmaister wer der immer ist hincz vnser vrawen gein der pfarr Sechszig pfenning vnd ob wir in daz verzugen vnd des vorgnanten zins nicht gaben all Iar so schullen si vns dar vmb zuo sperren vmb den vorgnanten zins an als recht sam ein iegleicher puriger tuet vmb sein verdienten zins vnd dar vber zeug der warheit geben wir in disen prief versigelt mit des erbern mannes wernharts in der Reutt auch puriger ze Salczburg anhangunden insigel im an allen sein schaden der sein insigel dar an hat gelait durch vnser pet willen dar vnder wir vns haben verpunden mit vnsern trewen an geuer als wir oben genant sein wan ich egnanter hainrich nicht aigens Insigels het. Der prief ist geben an sand Iörgen tag Do man zalt von Christz purt dreiczehen hundert Iar darnach in dem drew vnd fumfzigistem Iar.

Source Fulltext: DOPPLER