Ich Iacob der Sezfuez vergich offenbar mit disem prief allen denn die lesent oder horent daz ich mit wolbedachtem muet vnd auch mit gutleichem willen pei mein lemptigen zeiten du ich ez wol getun macht ledichleich geben han var allen mein frevnten vnd andern laütten meiner lieben Hawsfrawen Hailken mein Haus mit sampt der Hofstat daz gelegen ist enhalb Ache auf dem Stain vnd darzu alle mein Varend hab versuecht vnd vnuersuecht swie dev benant ist angewer also mit der beschaiden ob sie mich vberlebt. wär aber ob mir in Vrist ob mir der varuerschriben Hab nöt vnd durft geschäch ez wär an meiner leibnär oder an schäften an meiner Sel da schol mich mein egenantew Hawsfraw Hailkk an der varuerschriben Hab ze verseczen vnd ze verchauffen dar an nichtz irren noch engen mit dhain sachen vnczt an mein Tode nach mein Tode schol si ledichleich ir sein var allen lautten daz sey dhain mein frevnt dar an nichtz irren noch engen schol weder mit Recht noch an recht noch mit dchain sachen Vnd daz ir daz allez stat vnd auch vnzebrochen von mir beleib vnd dar vber so gib ich ir des zegezeug der warhait disen mein offen prief versigelt meins egenanten Iacobs anhangedem Insigel vnd mit des erbern mans Artliebs dez Rautter anhangedem Insigel der sein Insigel durich vnser pet willen im selben an schaden an disen prief gelegt hat ze einer pessarn Sicherhait allev disev varuerschriben gelüb stät an allen chrieg ze behalten angewer Dez sint zewg Her Hainreich vnd her chraft ze den zeiten gesellen auf dem Nünbürch Hainreich der Pettär Meinhart aus dem Nüntal Seidel der Güemel Hainreich der Fridolfinger Virgilij der Schreibär vnd ander erber laütt Der Prief ist geben nach christes gebürt vber drevczehen Hundert Iar dar nach in dem Vier vnd fünfczgisten Iar des Suntages vor sand Ovswalcz tage.

Source Fulltext: DOPPLER