Ich Elspet dew Stubechin ¹⁾ vnd alle mein Erben ez sein Sun oder Töchter verjehen Offenleich an disem prief vnd tun chunt allen den die disen prief an sechent Oder horent lesen. Daz ich mit guten willen vnd mit vertachtem muet vnd von Rechter Notturft ze chauffen han geben Redleiche vnd Rechtleiche Fridreichen von Awen ²⁾ ze den selben zeiten Richter ze mittersil vnd seiner Hausfrowen vnd allen iren Erben sun vnd Töchtern. mein Gut ze Stubach ²⁾. fur ain Rechtz freyezz Aygen. daz mir mein seiliger wirt. Chunrat dem Got genade ze morgengabe hat geben für Fierzich phunt Salczburger Phenning. ze den zeiten do er ez wol tun macht. vnd han in auch daz Gut geben mit allen den Nuczen vnd Rechten alz ichz vnd mein wirt inne haben gehabt besuchcz vnd vnbesuchtz mit allen nuczen vnd Rechten vnd zu dem gut gehört. ze holtz ze velde ze waide. in Awen oder in gesuechen Oder wie ez genant ist. vmb sechzich vnd ainlef phunt salczburger phenning. vnd mein sün sechzich phenning ze Leitchauf der wir verricht vnd gewert sein gancz vnd gar. wir verjechen auch mer daz wir dez vorgenanten Gutz ir gewer vnd furstant schullen sein für alle ansprach. chrieg vnd artigel. vnd alz aygenz Recht ist. an gefaer. Daet wir dez nicht naem si dez chain schaden. daz waer mit Recht oder an recht Oder von wew daz waer. den selben schaden vnd auch hauptgut. schullen si haben dacz vnsern trewen vnd auf aller vnser habe wa wir dew haben. auf aygen oder auf lehen oder ander vnser habe wa wir dew haben. vor allen andern Geltern. wir verjechen auch mer Ob ich oder meinew chint sun vnd Töchter mit in vmb daz gut indert ze chrieg wurten. oder ze stössen. daz waer mit Recht oder an Recht. oder von chaim vnserm freunt dew selben recht vnd chrieg schullen si gegen vns behabt haben vnd wir gegen in verloren. Der daiding sint zeug. Herr Chunrat Pharrer ze Stuluelden. Herr Vlrich Pharrer ze Phraenberch ³⁾. Herr Fridrich ze den zeiten vicari ze Puesendorf. Ebran von Schüt. Hainrich. Haedlaer. vnd ander Erber leut genuche. Daz in dew dew daiding staet vest beleiben dar vber geben wir in disen Offen prief versigelt vnder Herrn Hainrich Insigel von velben. vnd vnter dez Oswaltz Schönstainer. in Paiden an schaden die ez dar an geleit haben durch ir trewen vnd durch vnser pet willen. wan wir selber chain Insigel haben verpint wir vnz dar vnter mit vnsern trewen allez daz staet ze haben daz Oben verschriben ist. Der prief ist geben. Do man zalt von christ Purt dreuzechen hundert Iar dar nach in dem Funf vnd funfczgisten Iar. dez Phincztagezz in der Gantzen Fastwochen.

Source Fulltext: DOPPLER