Ich Hainreich von Velben vnd mein Hausfrowe vnd alle mein Erben verjechen vnd tun chunt allen den die disen prief ansechent oder horent lesen Daz ich mit wolbedachtem mut vnd mit guten willen han geben vnser vrowen Gotzhauzz ze Stuluelden in dew phrünt mein wisen Nider Vtendorf gelegen auf der Plumawe. dew mir ledich ist worten mit dem Tode von der weissin vnd von Iren Erben mit allen Eren Rechten Nutzen vnd gesuechen vnd zu der wisen gehört. vnd wie iz genant ist. für die ansprach die herr Chunrat der Pharrer ze Stueluelden. von der selben seiner chirchen wegen hat gehabt hincz Fridreich dem Noegelein. vmb daz selgeraet. vnd geschaeft. daz Nikel der Naegel sein Pruder dem Got genade an seinen lesten zeiten tet. Dem vorgenanten Goczhauzz ze Stuluelden auf der Swaig gelegen in dem Puechlach in dem Leuchental pey Chiczpüchel. vnd dew selben wisen hat mir Fridreich der vorgenant Naegel widerlegt mit aim Gut gehaissen daz Nider Aygen. an dem Schauelperg. in dem Chapprunne. auch han ich dew vorgenanten wisen dem egenanten Gotzhauzz geben fur Rechtz vnd ledigs aygen in Rechter selgretz weisse. vnd han mich vnd alle mein Erben aller ansprach vnd Rechtezz dar auf verzigen. vnd pin auch ich dez selben Gotzhauzz Gewer vnd verTrettaer an aller stat alz aygenz vnd des lantz Recht ist. Taet ich dez nicht daz schol der Pharrer vnd daz Gotzhauzz ze Stuluelden haben. auf mein trewen vnd auf aller mein habe. Der Tayding sint zeug Herr Nicla der Holerspeche Fridreich von Awen. ze den zeiten Richter ze Mittersil. Hainrich Swayger von Lopach. vnd ander Erber leut genuch. daz in dew tayding staet vest beleiben. Dar vber gib ich in disen Offen prief versigelt vnter meim anhangent Insigel. vnd vnter dem meinzz pruder. hern Eberhartz. Allez daz staet ze haben daz Oben verschriben ist. Der prief ist geben do man zalt von christ Purt Dreuzechen hundert Iar darnach in dem fumf vnd funfczgisten Iar an dem Aufert tach.

Source Fulltext: DOPPLER