Ich Hanns der Styeglär von Arnstorf vergich offenleich an disem prief allen den, di in ansehent, hörnt oder lesent. Das mier der ernwierdig Fürst, mein genadiger herr, her Gerhoh. Byschof ze Chyemsee. lazzen hat ze Sex iaren. all sein weingärten ze pawn mit allerlay paw vmb halben wein, di er vnd sein Gotzhaus hat ze Arnstorf, an dem perig, oder an der eben, besucht vnd vnbesucht, vnd sol ich die vorgenanten weingärten di selben sechs iar inne haben, mit steckhen, mit grueben, vnd mit aller anderr arbait, di dar zü gehort, mit allen den trewn, alls si mein rechts aygen wärn, an das, daz er das purchrecht alain richten sol, was suzzt dar auf get, mit zehent, mit huet. oder mit lesen, das füllen si halbs richten, mit iren poten, den si in das lesen senntent. Vnd dar vber ze einer pezzrung geit man mir iarleich in daz paw. ze liechtmizz. acht pfunt wyenner pfenning. Wenn auch die selben sechs iar aus chomen, vnd er oder sein nachchomen di weingärten pawen, oder anderswo hin lazzen wellent. dar an sol ich seu nicht ierren noch engen, vnd sol im si auch denn pawlich inantwurten, an alle widerred, vnd allen chrieg. Tät ich des nicht, vnd im sein weingärten nicht päwlich inantwurtt. was er des schaden näm oder genomen hiet, den sol ich im abtun gar vnd gantz, vnd sol er das haben. auf mier, auf meinen erben vnd auf aller vnser hab. die wir haben ze Osterreich oder anderswo, besücht vnd vnbesücht. Vnd dar vber ze einem vrchund Gib ich vorgenanter Hanns der Stiegler im den offen prief, mit meinem aigen anhangenden Insigel versigelt. Der geben ist ze Salzburg an sand Symonis vnd Iude tag. Anno domini Millesimo, ccc^mo quinquagesimo Septimo.

Source Fulltext: DOPPLER