Ich Fridreiche der Huntsedlaer ¹⁾ verjiche offenleiche an disem prief vnd tun chunt allen den die in ansechent oder hörent lesen. Daz mein lieber Herr Her Seibot der Plünberger ²⁾ dem got genade mich geben hat mit andern sein aigen leuten. pei seim lentigen leibe. mit wolbedachtem mut. vnd mit seiner freunt rat. Herrn Chunrat Pharrer ze Stuluelden. vnd vnser vrowen. vnd Irem Gotzhauzz da selben. für Recht aigen. auz seinem nutze vnd gewer in dez pharrer vnd vnser vrowen dacz Stuluelden. vnd schol auch ich vorgenanter Fridreich dem Pharrer. vnd vnser vrowen Gotzhauzz ze Stuluelden. trewe vnd gewer sein. alz ain Aigen man seim rechten herrn sein schol durch recht. an allez gefaer. vnd schulen mich auch inne haben mit Ieren trewen. alz ander Ier aigen leut. Ich verjiche auch, ob Iemant chom. vnd mit dem vorgenanten pharrer vnd mit seim Gotzhauzz vmb mich chriegen wolt. vnd mich mit dem rechten in auz der hant züge. des selben wolt ich vngolten sein. an meinn trewen. gegen in vnd gegen allermaenchleiche. Dez sint zeug her Chunrat der junge Velber. Hainrich von Sulczawe. Ebran von Schüt. der Aniche von Celle. Ebeil der Wisintin wiert von Pusendorf. Haensel der Iunge Aniche. Hainrich Swaiger ze Lopach ³⁾. vnd ander Erberleut genuche. Daz in dew daigen staet vest vnd vnzebrochen beleiben. Dar vber gib ich in vorgenanter Fridreich disen offen prief versigelt vnter dez Erbern hern Insigel. hern Fridreichez pharre (ze) zelle vnd probst da selben. vnd vnter dez Oswalten dez Schönstain. vnd vnter dez Friedreichz von der Awen. in allen drein an schaden. wan ich selbs chain Insigel han. verpint ich mich dar vnter mit mein trewen ze ainer sichrung allez daz staet ze haben vnd zefolfüren daz oben verschriben ist. Der prief ist geben. dacz mittersil do man zalt von christ purt dreuzehen hundert Iahr darnach in dem Acht vnd funfczgisten Iar. dez mittichen in den phingsten.

Source Fulltext: DOPPLER