Ich Hainrich Oechsenperger vergich für mich. für mein Hausfrawen vnd für alle vnser erben, offenleich an disem brief, allen den die in sehent hörent oder lesent, daz ich mit guotem willen vnd mit verdachtem muot, lazzen han, Maechtilden der chöchinn, vnd allen iern eriben mein Hofstat, die leit pei dem Chirchpache vnd den garten der dar zuo gehört besuocht vnd vnbesuocht mit allen nützen vnd dar zuo gehört vnd als si ez vnd ier vodrer wiert von mir gehabt habent. In der beschaidenhait, daz si vnd ier erben, mir oder meinen erben oder swer si vodert an si an meiner stat. Iaerchleich ie auf sand Mychels tag do von ze dienst geben schüllen fünftzikch phenning. dez geltz als der lantzherr an seiner voderung nimpt, vnd schol si vnd ier erben von mier vnd von meinen erben der vorgenanten hofstat vnd dez garten vnuertriben sein vmb den vorgenanten dienst all die weil sie mier den gebent auf die egenant zeit, an chrieg vnd an all irrsalum Vnd ze vrchund der warhait gib ich ier vnd iern erben für mich vnd für mein erben disen brief versigelt vnder meinem Insygel. dez sind zeug Ortolf graeswein. Chunrat Oechsenperger. Empel ab der prukgen vnd ander erberg laeut genuog. Datum anno domini M ^o ccc ^mo lvij ^o proxima sexta feria post Purificacionem beate Marie.

Source Fulltext: DOPPLER