Ich Nicla der Holerspeche vnd ich Iacob der Oeder vnd vnser Hausfrowen vnd alle vnser Erben iz sein Sün oder Töchter verjehen offenleich an disem Prief vnd tun chunt allen den die diesen prief ansechent oder hörent lesen. Daz wier mit guten willen vnd mit verdachtem mut. vnd mit vnser vreunt rat vnd gunst. haben gewidemt vnd gemacht. durch vnser vnd vnser vodern sel willen. vnser Guet auf dem Geiselperch. daz rechtz aigen ist. besuchtz vnd vnbesuchtz. mit allen Eren Rechten nutzen vnd gesuchen die zue dem Guet gehörent. zeholcz ze velde ze waide. Oder wie iz genant ist. herrn Vlreich Pharrer ze Praenberch. vnd allen sein nachchom. Er schol auch albochen am maentach ain messe haben ze Holerspach. Ob sich daz verzug daz erz am maentach nicht mocht gehaben so schol erz dar nach in der wochen haben. ainez andern tagez angeuaer. Ezz schol auch dew selbe messe nicht abgen von andern messen. Iz sei von Iartaegen. oder von dulden. oder von hochzeiten. oder von wew daz waer daz dew messe nicht volfürt wurt alz daiding ist. so schulle wier vnd vnd vnser Erben daz vorgenannten guetz so lang vnterziehen hüncz vnzz dew messe volfürt wiert. wier schullen auch dez vorgenanten guetz ir herr vnd gewer sein, alz aigenz recht ist. vnd der grafschaft daz gut inne leit angeuaer an aller stat wa in sein not vnd durft geschicht. daet wier dez nicht naem si dez chain schaden von wew daz waer daz schullen si haben. waer auer daz sich mein herr von chiemsee sich dez gutz wolt vnterziehen. so schulle wier vnz dez vorgenanten guetz selbs vnterziehen. hüncz daz iz dem obgenanten pharrer vnd sein nachchom gar richtich wirt gegen aller maenchleich. Der sache sint zeug. Hainrich von Sulczawe. ze den selben zeiten richter ze mittersil. Oswalt Schönstain. Fridreich von Awen. vnd ander Erber leut genueche. Daz in dew Daiding staet vest beleiben dar vber geben wier dem vorgenanten pharrer vnd allen sein Nachchom disen Offen prief versigelt vnter meim vorgenanten Niclaz dez holerspechen Insigel. vnd vnter daz hern Hainrich von velben im an schaden der iz dar an gelegt hat durch seiner trewen willen vnd durch vnser pet willen, so verjich ich vorgenanter Iacob der Oeder. daz ich aigenz Insigel nicht han verpint ich mich vnter dew vorgenanten zwai Insigel. allez daz staet ze haben. vnd zefolfüren. waz oben geschriben vnd gedaidingt ist. Der prief ist geben do man zalt von Christ Purt dreuzzechen Hundert Iar. darnach in dem Neun. vnd funfczgisten Iar. an sant Erhartz tach.

Source Fulltext: DOPPLER