Ich Fridreich der Rott mein Hausfraw vnd all mein erben vergehen vnd tun chunt offenbar mit disem brief allen den die in ansehent hörent oder lesent, Daz wier mit wolbedachtem muet recht vnd redleich vnd nach rat mein prueders hern Otachers pfarrer ze Trazenmawer ¹⁾ vnd ander meiner freunt ze chauffen haben geben den erbern lauten hern hainrich ze den selben zeiten pfarrer ze Hof ²⁾ vnd den zechlauten vnd allen pfarrläuten daselbs funf Schilling pfenning Salczpurger gelcz ze rechtem dienst vnd ainundzainczig phenning gelcz ze weiset als salczpurger pfenning oder pfenning di dan gib vnd gäb sint auf einem guet daz gelengen ist in derselben pfarr ze Hof in dem Mulpach vnd gehaizzen ist Henhart ³⁾ mit allen den ern rechten nuczen vnd gesuechen die dar zue gehorent besuecht vnd vnbesuecht Vmb Neun pfunt Salczpurger pfenning der si vns gericht vnd gewert habent gar vnd ganczleich. Vnd sol auch ich egenanter Fridreich der Rot mein Hausfraw vnd all mein erben der egenanten funf schilling vnd ainundzainczig pfenning gelcz als oben verschriben stat. der egenanten laüt. des pfarrer ze Hof vnd der zechlaüt vnd der pfarrlaüt vnd des goczhaus ze vnser frawen ze Hof zu dem ewigen liecht ier Herr vnd ir gewer vnd auztrager sein an aller der stat wo in sein not oder durft geschit Daz sei mit gaistleichem oder weltleichem recht als rechcz lechens vnd lancz rechcz ist an geuer. Vnd sullen si vnd das goczhaus ze vnser Frawen ze Hof daz haben auf vns vnd auf vnsern trewen vnd auf aller vnser hab wo wier di haben inner lancz oder auzzer lancz besuecht oder vnbesuecht vor allen andern lauten oder geltern, Vnd daz in daz vnd dem oftgenanten goczhaus ze vnser frawn zue dem ewigen liecht di tayting di oben verschriben stent gancz staet vnd vnzebrochen von vns vnsern erben beleiben Gib ich in oftgenanter Fridreich der Rot disen offen prief versigelt mit meinem anhangunden Insigel Dar vnder ich mich oftgenanter Fridreich der Rot verpint mit sampt meiner hausfrawn vnd all mein erben alles daz ze haben staet vnd ze volfuren daz oben verschriben staet. Der prief ist geben do man zalt. von Christes gepuert Drewczechen Hundert Iar dar nach in dem Newn vnd funfczgisten Iar an sand Pertelmes tag.

Source Fulltext: DOPPLER