Ich Hainrich Adler Ich Chunigund sein hausfrawe, wier veriehen für vns vnd für all vnser erben, offenbar mit disem brief allen den die in sehent hörent oder lesent, daz wier mit guotem willen vnd mit verdachtem muot nach vnserr freunt vnd anderr erberger laeut Rat, geben vnd geschaft haben durch vnserr vnd aller vnserr vodern Sel willen, ainen gantzen garten der leit ob dez marchtz ze chitzpühel in der gazzen ze naechst pei dem garten den wier geben haben dem gotzhaus ze sand Iohanschirchen den wier chauft haben von Fridrich dem schurf Ruchter, Sand Andres gotzhaus ze chitzpühel, besuocht vnd vnbesuocht mit allen nützen vnd dar zuo gehört, In der beschaiden, daz wier vnd vnser erben den selben garten inn haben schüllen. daz wier dem egenanten gotzhaus oder swer sein phleger vnd chirchprobst ist. Iaerchleich ie auf sand Michelstag do von ze dienst geben schüllen an zwen funftzikch phenning ie ainen chraeuczer für Drei phenning, vnd taet wir dez nicht Swer dann dez vorgenanten gotzhauss chirchprobst ist, der hat gwalt dez selben gelcz ab dem garten oder swer den inn hat ze bechömmen als dienstz recht ist, vnd schüllen auch wier oder vnser erben oder swer den garten inn hat Iaerchleich die voderung die ze recht do von gehört ausrichten gen der herrschaft, vnd swann wier oder vnser erben nimer sein. swer dann vnser naechst freunt oder erben sind, die habent allin die recht auf den garten die wier dar auf hieten, ob si die haben wellent, wolten oder möchten si der recht auf dem garten nicht gehaben, so mag sein der chirchprobst niezzen so er maist mag. Dez ze vrchünd haben wier vns verpunden ich vorgenanter Hainrich vnd ich chünigund sein hausfrawe, vnder der purger Insigel ze chitzpühel, die ez durch vnser fleizziger pet willen an den brief gehangen habent in vnd dem Marcht an schaden, wan wier selber nicht Insygel hieten. dez sind zeug Gerolt purger ze chitzpühel, Fridrich praemel, Hainrich champer, vnd ander erberger laeut genuog. Datum Anno domini M ^o CCC ^mo lx ^o proxima secunda feria post festum sancte Dorothee virginis.

Source Fulltext: DOPPLER