Wir. Fridreich der Huntfedlär, Fridreich der Veirtach, Chunrat ab dem Wydem, Hainrich der Veirl, Chunrat der Prüler, Iacob von Huntsedel, vnd Leutold ab dem Scharren, vergehen offenbar an disem prief, daz wir wol bechennen, gemainchleich vnd bedacht haben Daz vnz vnser lieber Herr Her Seibott der Plümberger dem got genad, wol anderthalb Iar vor seim töd, mit wolbedachtem muet, vnd nach seiner Vreunt rat, vnd besunderleich nach vnserr pet, hat ze rechtem aygen gegeben vnser Vrawn Gotzhauz ze Stueluelden mit allen den rechten vnd nüczen, alz er vns an aigner läut stat inn hat gehabt, vnuersprochenlich in nucz vnd gewer, vnd hat vnz allsant, waz er vnser gehabt hat, aufgeben Hern Chunrat ze den zeitten Pharrer ze Stuluelden, an vnser vrawen stat, da wir all engagen sein gewesen, vnd hat vnz im geantburt, in sein nucz vnd gewer vor den erbern Herren Hern Fridreich Pharrer ze Chirchpüchel dem got genad Hern Englharten Pfarrer ze Puesendorf Hern Götfriden Pfarrer ze Prännberch vnd vor andern erbern läutten genug, Vnd haben auch gemainkchleich an aydez stat verhaizzen vnd gelobt dem vorgenanten Hern Chunrat Pharrer ze Stuluelden, seim Goczhauz vnd allen seinen nachchomen ze warten vnd gehörsam ze sein, trewleich an alles gevär, vnd an aller stat, alz ander trew aigen läutt irer rechten herschaft von recht warten schullen. vnd schullen auch vns trewleich inn haben, vnd gewaltes vnd vnrechtes vor sein, alz verr si mügen, an gevär. Wär auer daz vnz dem vorgenanten Goczhaus ze Stueluelden ieman ze chrieg tät, dar vmb schull wier an im nicht wenkchen noch prechen, wir würden im dann mit dem rechten, anbehabt, dez schullen wier an vnsern trewen vnengolten sein, gen im, vnd gen allen läutten. Dar vber ze vrchund der warhait geben wier dem vorgenanten Goczhaus disen offen brief vnder dez Erbern herrn, Hern Hainrich von Velben, vnd der erbern läutt Oswaldes dez Schonnstain vnd Fridreich von Awen Insigelln versigelten, di die durch vnserr pet willen in an schaden dar an habent gehangen, wann wier aigen Insigel nicht haben. Der prief ist geben do man zalt von Christes gepurd Dreuczehen Hundert Iar dar nach in dem Sechczkisten Iar An dem Palm tag.

Source Fulltext: DOPPLER