Ich Iohans der Friesinger vnd ich Hainrich sein prueder. wier vergehen mit disem prief für vns vnd für all vnser Erben. allen den die in sehent horent oder lesent. Daz wier mit Guetem willen vnd nach Rat Erber laeut Chaeufleich ze Chauffen geben haben. Hainrich dem Maeuslein purger ze Chiczpuhel seiner Hausfraeun vnd allen iren Erben Zehen schilling Ewigs Gelcz an all abgang. Rechcz Aigens auf dem Guet dacz Harpeunt ¹⁾ vnd leit ein Chiczpuhler Gericht. Vmb zehen phunt phenning ²⁾ der Si vns gericht vnd gewert habent gar vnd gancz. Wir schullen auch der egenanten zehen schilling gelcz ier Recht gewern sein an aller Stat wo in dez nöt geschicht. Als dez landes da der egenant gelt inn leit. vnd Rechcz Aigens Recht ist Waer auch ob die egenant zehen schilling Geltz mit dem Rechten anspraechig wurden. wurd in daz von vns nicht aeusgetragen als Recht wer naemen Si dez chainen schaden wie der genant wer den schullen wier in ab tuen gar vnd gancz vnberet ier ains treun dar vmb ze glaewben an aid. vnd schullen Si daz haben auf vnsern treun vnd auf vnserm Guet. daz haizt ober veld daz auch Rechcz Aigen vnd leit ein dem selben gericht. Das wier in ze Rechtem fürpfant dar vmb geseczt haben vnd schullen Si all iar ein Hün dar ab nemen ze nucz vnd ze gewer piz daz sich die gewerschaft an den egenanten zehen schilling gelcz vergangen hat nach des landes Recht. Dez ze vrchund geben wier in disen prief versigelt mit meinem vorgenant Hansen dez Friesinger anhangendem Insigel. da ich mich egenanter Hainrich sein prueder vnder verpind mit meinen treun wan ich an geuer nicht Aigen Insigels het. Dez sind zeug Iohans vnd Paertel die Swab purger ze Chiczpuhel Ortolf der Munichawer vnd ander Erber laeut genueg. Datum Anno Domini M ^o ccc ^o lx ^o in Vigilia beati Johannis Baptiste.

Source Fulltext: DOPPLER