Ich Fridreich Praemel Ich Diemuot sein hausfrawe, wier veriehen für vns vnd für all vnser erben Offenbar mit disem brief allen den die in sehent hörent oder lesent Daz wier mit guetem willen vnd mit verdachtem muot nach vnsrer freunt vnd auch andrer erberger laeut Rat durch vnsrer vnd auch aller vnsrer vodern Sel willen geben vnd geschaft haben nach vnsrer paider tod, vnser peunt die leit vnder dem Schapperg pei der prunnpeunt die gehört in dez Chüssenphenning lehen, zu sand Andres gotzhaus ze Chitzpühel besuocht vnd vnbesuocht mit allen nützen vnd rechten vnd dar zuo gehört. In der beschaidenhait daz man von der selben peunt was die verdienen vnd vertragen mag ewichleich vnd Iaerchleich machen schol die chertz die hangt in dem chor. vnd der herschaft ir voderung do von Iaerchleich ausrichten die ze recht do von gehört, wier haben auch daz selb geschaeft getan in der weis daz wier pei vnserm lebentigen noch nach vnserm tod dhainen gwalt haben schüllen die egenant peunt ze verchauffen, ze verchumbern noch ze versetzen vmb dhainerlay sachen, niur daz wier die selb chertz von derselben peunt pei vnserm lebentigen Iaerchlich machen schüllen, vnd swann wier nimer sein swer dann dez vorgenanten gotzhaus Chirchprobst vnd phleger ist, der schol die selb peunt hin lazzen nach der purger Rat ze chitzpühel swelich dann dez Ratz sind, vnd schol die vorgenant chertz ewichleich vnd Iaerchleich do von machen vnd der Herschaft ir voderung do von ausrichten. vnd waer icht vberigs do daz schol beleiben pei dem egenanten gotzhaus. Auch hab wier geschaft swann wir nimer sein swelich dann vnserer naechst vnd pest freunt sind ob die di vorgenant peunt haben wolten den schol mans lazzen für andrer laeut also daz daz obgenant geschaeft do von volpracht werde. vnd ob die selben vnsrer freunt dar vmb ze chrieg chömen. daz ainer für den andern die peunt haben wolt swem dann der Chirchprobst nach der purger Rat die peunt lazzent dez si zimt von iren trewen. die die naechsten erben dar zuo sein Die schüllen die peunt haben vnd schüllen die andern dhain widerred do wider haben. waer auer ob die selben vnsrer freunt die peunt nicht wesenleich vnd pauleich legten an allen sachen so hat der Chirchprobst gwalt nach der purger Rat die oftgenant peunt hin ze lazzen wem er will an all ir widerred in der weis daz daz obgenant geschaeft do von volfürt vnd vol endet werd als oben geschriben stet. Dez ze vrchund geben wir disen brief versygelten vnder der purger Insygel ze chitzpühel. die ez durch vnser pet willen an den brief gelegt habent in an schaden wan wier selber nicht Insygel hieten. Dez geschaeftz vnd der taidding sind zeug Her Ortolf ze den zeiten Vicarij ze sand Iohans chirchen, paertel der Swab, Dietrich Schaflüczel, Perchtold von dürrenperch, Hainrich der Champer vnd ander erbrger laeut genuog. Datum Anno Domini M^o ccc^mo lx^o. proxima sexta feria post festum Natiuitatis gloriose virginis Marie.

Source Fulltext: DOPPLER