Ich Ians der Stubech vnd ich Hainrich sein bruoder veriehen offenlich mit disem prief für vns für vnser Hausfrawen vnd für all vnser erben Sün vnd töhter allen den di in ansehent oder hörnt lesen Daz wir mit willen vnd mit verdachtem muot vnd besunderlich mit gunst vnd rat Nyclas des Stubechen vnsers Vettern vnd auch Agnesen mein vorgenants Iansen hausfrawen Magdalen der Chrophinne Agnesen vnd Kathrein des egenanten Nyclas swester Vnd ander vnserr frewnt reht vnd redlich verchavft haben dem erbern manne Herrn Chunraden Pfarrer ze Stueluelden vnd seiner chirchen do selben vnser Aygen ze Pavm ¹⁾ daz gelegen ist ob Pirtendorf da Hainrich auf sitzet vnd dauon er Ierlich dient ein halbs hundert Ches vnd vier Weiset Wir haben auch im vnd seinem vorgenanten Gotshaws daz obgeschriben aygen geben besuochts vnd vnbesuochts mit allen den rehten eren vnd nützen di dar zuo gehörnt wie di genant sint Vmb Sechs pfunt Salzburger pfenning der er vns gar vnd gantz gericht vnd gewert hat, Mit der beschaiden daz der egenant Pfarrer oder sein Nachchomen von Weinahten di schierst chöment ein gantz Iar all wochen ein Messe sol haizzen haben datz Vtendorf vnser vnd vnserr vodern sel ze hilf vnd ze trost auf welhen tag er des aller pest bechomen mag an geuer Also daz der selben Chirchen ze Vtendorf gewönlicher gotsdienst dar an niht abge. Vnd wanne sich das Iar verget so ist vns der vorgenant Pfarrer noch dehain sein Nachchomen derselben Messe nimmer schuldig vnd gepunden Vnd haben hintz in dar vmb nimmer ze reden noch ze sprechen wenich oder vil Wir verpinten vns auch vnser Hausfrawen vnd all vnser erben gein dem oftgenanten Pfarrer vnd hintz seinem Gotshaws ze Stueluelden des vorgenanten Aygens reht gewer vnd vertreter ze sein an geuer an aller der stat do in des not geschicht als aygens vnd des landes da ez inne leit reht ist Vnd wie getanen schaden er oder sein vorgenants Gotshaws ze Stueluelden des naemen den schullen si haben auf vnsern trewen vnd auf aller vnser hab besuocht oder vnbesuocht wie die genant ist Dar vber veriehen wir vorgenant Agnes vnd Nycla, Magdalen Agnes vnd Katrey für vns vnd für all vnser erben daz sich der vorgenant chavff vergangen hat vnd geschehen ist mit vnserm guotem willen rat vnd gunst vnd haben auch dar vmb hant gerecht vnd verzeihen vns vnd vnser erben aller ansprach di wir oder di selben vnser erben auf daz vorgenant aygen gehaben möhten mit reht oder an reht Vnd dar über zuo einem vrchund geben wir dem oftgenanten Pfarrer vnd seinem Gotshaws ze Stueluelden disen brief versigelten vnder des erbern Herren Hern Hainrich des Velbers ze den zeiten Pflegers ze Mittersil, vnd vnder Hainrichs von Sultzaw auch ze den zeiten Richters ze Mittersil Insigel di si durch vnser fleizziger pet willen an disen brief gehangen habent in an schaden Dar vnder wir vorgenant Ians Hainrich vnd Nicla die Stubechen Agnes Magdalen Agnes vnd Kathrey vns für vns vnd für all vnser erben sün vnd töhter verpinten mit vnsern trewen allez daz stet vnd vnzerbrochen behalten an geuer waz oben verschriben ist, wann wir aygner Insigel niht enhaben. Der obgeschriben taiding sint zeug Her Nycla der Holerspech Ritter, Her Ians der Preisinger, Oswalt der Schonnstain, Vlrich Schonnhouer, Hainrich der Schreiber von Cell, Chuonrad der Smit von Hinterpühel vnd anderr erberger läwt genuog. Der brief ist geben nach Christi gepuertt do man zalt Dreuzehen Hundert Iar vnd dar nach in dem Sechtzigisten Iar an Sant Lucien abent.

Source Fulltext: DOPPLER