Ich Fridreich der Pongawer von Hof. vnd mein hausvrau, vnd mein suon Fridreich vnd darnach all mein sün vnd töchter vnd all ir erben wir veriehen offenleich an dem prief vnt tuon chunt allen den die in sehent oder horent lesen, daz wir mit guotem willen vnd mit verdachtem muot, Recht vnd Redleich ze chauffen haben geben. Hainreichen dem Lindlein aus vnserm guot, daz wir haben, datz hof ¹⁾, da wir selb aufgesezzen sein, Sechs schilling geltz, di wir im, oder swer vns vm sein wegen mit dem prief mant, allen Iar Iärchleich dienen vnd geben schullen, Wir haben im ez auch also ze chauffen geben mit allen den eren nützen vnd gesuechen vnd Rechten, di dar zuo gehorent. swie di genant sint, an haus vnd an hofstat vnd hat vns auch di vorgnanten sechs schilling geltz gar vnd gentzleich vergolten nach allem vnserm willen. vnd sein dez von im gewert. an allen schaden. Wir haben im es auch aufgeben vnd richtig gemacht mit vnsers herren hant hern Hansen von Goldekk da wir es von ze lehen haben gehabt, vnd der im es verlihen hat mit vnserm guerleichem willen vnd schullen auch wir mit im stiften, als ander laüt mit ir herren tuont. vnd Iärchleich in ir stift gen Vnd waer daz, daz er di selben sechs schilling geltz wolt versetzen oder verchauffen, da schullen wir in nichtes irren an. Also verzeihen wir vns derselben sechs schilling gelts als vorverschriben stet, daz verhaizzen wir in mit vnsern trewn an aidez stat. staet ze behaben vnd ze volfüren. Vnd geben in dar vber ze ainem vrchund der warhait den prief versigelt mit dez Erbern herren hern vlreichs des Chalhochsperger anhangenden Insigel, der daz durch vnser pet willen an den prief gelegt hat im selb an schaden. Dar vnder wir vns vnuerschaidenleich mit einander verpunden haben mit vnsern trewn. wan wir selb nicht insigel heten Der prief ist geben an sant Marteins tag Nach christes gepurt dreuzehen hundert iar, in dem ains vnd sechskisten Iar.

Source Fulltext: DOPPLER