Ich Chuenrat Püchler ich Elspet sein Hausfrawe veriehen für vns vnd fur vnser erben. offenleich an dem brief. daz wier mit guetem willen vnd mit verdachtem muet. geben vnd geschaft haben. Ain vier tail. Ains gantzen garten. den wier von dem scheftler chauft haben. ze sand Nyclas chertzen. die hangt in sand Andres gotzhaus ze chitzpühel neben dez mittern Altar. besuecht vnd vnbesuecht. in der beschaiden. daz wier daz selb viertail dez garten selber inn haben schullen vnd niezzen. die weil wier leben. vnd schüllen iaerchleich do von geben zwen chraeuczer ze vrchund vnd nutz vnd gwer. ze der selben cherczen. Vnd swann wier dann nimer sein. swer dann des vorgenannten sand andres chirchprobst ist. der schol sich dez vorgenannten viertails vnderwinden. vnd swas daz dann gelten mag. daz schol er geben zu der vorgenannten chertzen. dez ze vrchund geben wier den brief versygelt vnder Iohansen dez Swab Insygel im an schaden. dez sind zeug. Hainrich Meylinger. Dietel oder. Haintz der jung Püchler vnd ander erberger laeut genueg. Datum Anno domini M ^o CCC ^mo lxvij ^mo. In die sancti Pangratij.

Source Fulltext: DOPPLER