Ich Vlreich der Schafluczel vnd ich Agnes sein Hausfraw wier veriehen für vns vnd für all vnser Erben. Daz wier mit guetem willen vnd mit verdachtem muet vnd ze der zeit da wier ez wol getuen machten. ledichleich geben vnd bestat haben sand Andres Goczhaus ze Chiczpühel vnser Guet ze Stogchach. ¹⁾ da weilent der Grauzz aufgesezzen ist. mit allen Eren Rechten vnd nützen die dar zue gehörnt oder da von bechom mügen wie die genant sind besucht vnd vnbesucht. als wier ez ze lehen gehabt haben von dem Goczhaus von Pabenberch ²⁾ vnd haben daz getan durich vnser vnd aller vnser vödern Sel willen mit der beschaiden vnd mit dem geding. wer dez selben goczhaus Chirichprobst ist der ieczu ist oder furpas wirt. vns vnd vnsern vodern all iar Ewichleich ainen Iartag da von begen schol auf Sand Iorgen tag. in der nachsten wochen vor oder nach vnd wann der pharrer dar zue chumt. dem schol man geben ayn phunt perner. vnd dem gesellen ze Chiczpühel Acht chraeuczer. vnd dem Chaplan Sechs chraewczer vnd mer ainem priester acht chraeuczer. also schullen all iar der iartag begang werden mit vier priestern. Ez schol auch all iar der gesell zu Chiczpühel an dem Iartag dez Abencz ein Vigili Singen da schol er besunder von haben all iar Sechs chraeuczer. vnd dem Schulmaister vier chraeuczer. vnd dem Mesner zwei chraeuczer. vnd Siben phunt perner arm laeuten all iar vmb ches vnd vmb pröt. waer auer daz an der gult von dem guet icht vber wurd. daz schol man geben den Goczhaeusern gen sand Iohans chirichen. vnd sand Andre. Ez schol auch der Chirichprost daz geschaefft vnd den iartag all iar begen vnd handeln nach vnser nachsten zwaier frunt Rat. waer daz die absturrben So enphilich ich ez den purgern wer ze der zeit des Ratz ist ze Chiczpühel mit samt dem chirichprobst hincz iren treun. Ez schol auch der Chirichprobst daz selb gvet Raichen vnd enphahen ze ie der zeit als Recht vnd pilleich ist. vnd schol haben all iar die weisat von dem guet oder zwelif phenning von seiner mue Er schol auch daz guet Stifften nach der selben frunt oder der purger Rat. Dez ze vrchund geben wir dem vorgenanten Goczhaus den prief versigelt mit Larenczen dez Sluncz ze der zeit Richter ze Chiczpühel anhangendem insigel. im an schaden. Dez sind zeug Herr Ortolf ze der zeit Vicari ze sand Iohans Chirichen. Hainreich Merlinger. Partel der Swab. Fridreich der Praemel. Dietreich der Öder vnd ander Erber laeut genueg. Datum Anno Domini M ^o. ccc lx Ochtauo proxima Tercia post Martini

Source Fulltext: DOPPLER