Ich Vll der Swartz ze Pühel pey sand Veit in dem Pongawe vnd mein Hausfraw wir veriehen für vnz vnd für all vnser Eriben vnd nachkomen offenbar mit dem prief. daz wir vnuerschaidenleich mit wolbedachtem muot nach rat vnsrer nachsten frewnt vnd rechtleich vnuersprochenleich ledichleich aufgeben haben Dem Erbern beschaiden Hansen dem Speher ¹⁾ Purger ze Saltzburg vnd allen seinen Eriben. daz guet pey sand Veit ze Pühel. ²⁾ haist ze dem Löchlein. ³⁾ daz wir von in ze Pawrecht gehabt haben vnd habent daz durch vnserr vleizzigen pet willen von vnz aufgenomen. also pawrecht vnd dez lantz recht ist an gevär. also mit der beschaiden. daz wir noch vnser Eriben noch niemt von vnsern wegen auf daz vorgenant guet noch Pawrecht ewichleich vnd ymmer dhain vodrung noch ansprach noch recht nicht mer haben schullen weder mit recht noch an recht noch mit dhainen sachen an gevär. wann wir vnz dez guetz vnd aller der recht di wir dar auf gehabt haben gar vnd gäntzleich verzeihen vnd verzigen haben an gevär. Wir veriehen auch mit wem oder wann sew ier obgenantz guet stiftent vnd störent. dar auf dar ab daz ist vnd sol vnser gueter will sein. daz wir sew noch niemt dar an weder engen noch irren schullen weder mit warten noch mit werichen haimleich noch offenleich nur füdern vnd nicht hindern an gevär. vnd schüllen si daz allez haben datz vnz vnd datz vnsern trewn. vnd dar zue auf aller vnsrer hab wo wir dew haben vnd wie dew genant ist angevär. Der Handlung sind zeugen vnd taydinger gewesen di Erbern laut Fridreich der Fäustling. Walther von Ramseyden. Chunrat der Plähueber. Chunrat der Swartz. Fridreich der Swartz. Hainreich von dem alten Hof ⁴⁾ vnd Nicla sein prueder. Chuenrat der Dürrenpacher. Meinhart von Schernperg. Fridreich der Weizz. Hänsel der Iung Lantman vnd ander erbär laeut. Daz in daz allez staet vnd vnzerbrochen beleib. dar vber zue ainem vrchund der warhait geben wir in den vnsern offen prief versigelten mit dez Erbern mann Chuenratz dez Pründlinger anhangunden Insigel. der daz durch vnsrer vleizzigen pet willen an den prief gelegt hat zue ainer zeugnüzz im vnd seinen Eriben an schaden. Dar vnder verpinten wir vnz vnd vnser Eriben mit vnsern trewn allez daz ze volfürn vnd staet ze behalten daz an dem prief stet geschriben wann wir nicht aygen Insigel haben. Der prief ist geben an sand Niclas tag nach Kristy gepürt Drewtzzehen Hundert iar vnd darnach in dem acht vnd sechtzkistem iar.

Source Fulltext: DOPPLER