Ich Hainrich Champer vnd ich Chunigunt sein Hawsfraw wir vergehen offenleich mit dem brief für vns vnd für all vnser erben, daz wir mit wolbedachtem muet zu der zeit do wir ez wol getün mochten geben vnd bestät haben sand andres gotshaws ze Chitzpühel zü ainem ewigen liecht für gotsleichnam vnser äcker ¹⁾ halb di da ligent in der micheln ²⁾ pewnt neben des Mawrachs ³⁾ mit allen nützen vnd rechten di dar zü gehörent In der beschaiden daz ich vnd mein hawsfraw die vorgenant äcker vnser lebtag inne haben vnd niezzen schüllen vnd schüllen Iärleich da von geben auf sand Michels tag ain halbpfunt pfenning ye ain Chrewtzer für drey pfenning. Vnd wan wir nimmer sein schüllen so schüllen die vorgenannt äcker des obgenanten gotshaws zu dem ewigen liecht ledigs güt sein an auzgenomenleich daz man der herschaft ir gewönleich vodrung da von geben schol. des zeurchund geben wir dem obgenanten gotshaws den brief versigelten mit lorentzen des Slunts hangendem Insigel im an schaden Des sint zewg Chüntz im Mawrach Peter Gramätsch Vlrich Schütwürfel vnd ander Erberger lewt genüg. Datum anno domini M ^o. ccc ^o lxviiij ^o In Kathedra sancti Petri apostoli

Source Fulltext: DOPPLER