Ich Hainrich Mewsel vergich für mich vnd für all mein erben Daz ich mit wolbedachtem müt zü der zeit do ich ez wol getün mocht geben vnd geschafft han Meiner wirtinn Dymüten mein halbz haus vnd hofstat vnd waz dar zü gehört Daz leit in dem marcht ze Chitzpühel, Also daz si all iar da von geben schol ein pfunt pfenning der münzz di ze den zeiten gib vnd gäb ist in dem land in daz liecht ¹⁾ daz da prinnt vor gotsleichnam in sand Andres gotshaus. Oder wan si chaufft dem vorgenanten gotshaus in daz selb Liecht ein pfunt gelts rechts aigens Iärleichs gelts so ist ir daz vorgenant halbs haus afftendes ledig vnd los vnd mag da mit schaffen vnd tün waz si wil. Ich han ir auch geschaft meinen tail des hofs ze Altpach ²⁾ vnd meinen tail des Swaig lehens ³⁾ do selben mit allen eren nützen vnd rechten di dar zü gehörent wie di genant sint, vnd han ir die bestät mit herren hant. Wär aber daz si ez erübrigen mag, vnd wann si nimmer ist, so schol Ott der Dynger vnd sein erben ein viertail auz dem vorgenanten meinem tail der güt erben mit allen nützen vnd rechten di dar zü gehörent an allen chrieg vnd meiner erben vnd frewnt widerred, darnach sol mein Swester Agnes von Tegernsee vnd ir erben auz den selben güten erben auch ein viertail mit allen den eren nützen vnd rechten di dar zü gehörent auch an allen chrieg vnd meiner erben vnd frewnt widerred. Dar nach der ander halb tail der vorgenanten güt schol erben auf Petern Gramätschen auf sein Hawsfrawn vnd all ir erben auch mit allen nützen vnd rechten di dar zü gehörent auch an allen chrieg vnd meiner erben vnd frewnt widerred. Ich schaff auch daz mein vorgenant wirtinn die zwen Aecker in peden marchtuelden inn haben schol ir lebtag, vnd schol da von auzrichten all iar daz geschäfft daz ich dar auf getan han, den zwain gotshewsern sand Andren vnd sand Kathreyn in aller weis als di brief sagent di pediw gotshewser von mir habent. vnd wann si nimmer ist so sol man den nächsten erben di vorgenant äcker in den selben rechten lazzen. Dar zü han ich ir geschafft allw mein varent hab wie die genant ist daz sie da von auzrichten schol waz ich gelten schol oder waz ich meinen frewnten oder an mein Sel geschafft. dar zu sol si inn haben di güt vnd gült di ich auf di gotshewser geschafft han ir lebtag vnd da von all Iar auzrichten vnd volfüren allez daz geschäfft daz die brief lautent vnd sagent di die gotshewser von mir inn habent. Vnd an dem vorgenanten geschäfft schol ir chain mein erb noch frewnt chain irrung noch chrieg nicht tün mit chainen sachen ez sei gaistleich oder werltleich. So han ich geschafft Hainrich dem Gramätschen vnd Thoman dem Rüdlant iren hawsfrawen vnd iren erben, den andern tail meins haus vnd hofstat, also daz der vorgenant Thoman dar ab bechomen schol zwaintzik march an seinem heyratgut, vnd waz inn dar an ab gieng daz sol er haben auf meinem tail der wisen di da leit vnder dem Ahrain, Vnd da sol Hainrich Gramätsch vnd sein erben lösung vmb haben. Wär aber daz si ped vnd ir hausfrawen stürben an erben, so schol ez erben auf ir nächst erben. Wär daz daz die auch sturben so schol ez dar nach erben halbs auf meiner swester chint Agnesen vnd halbs auf Petern Gramätschen auf sein hausfrawn vnd auf ir erben. Ich schaff auch meiner Swester Agnesen vnd iren chinden mein tail des güts ze Altpach als ich ez gechaufft han von der Vinsterwalderinn für ledigs vnd freyez aygen mit allen nützen vnd rechten die dar zu gehörent also daz ir chain mein erb noch frewnt chainen chrieg noch irrung dar an tün schüllen mit chainen sachen. Daz daz vorgenant geschäfft also stät vnd vnzebrochen beleib dar vber ze einem waren vrchund gib ich allen den vorgeschriben den brief versigelten mit meinem anhangenden Insigel vnd mit Larentzen des Slunt ze der zeit Richter ze Chitzpühel hangenden Insigel im an schaden. Des sint zewg Herr Ortolf ze den zeiten vicarij zu sand Iohanns Herr Hanns ze der zeit verweser dacz Spital Oswalt Schönstain Hainrich Meylinger Partel Swab Fritz ab dem Pühel Ott der Pühler vnd ander erberger lewt genüg. Datum anno domini M ^o ccc ^o lxviiij ^o In die sancti Mathei apostoli et ewangeliste.

Source Fulltext: DOPPLER