Ich Hainrich der Mewsel vergich für mich vnd für all mein erben, Daz ich mit gütem willen vnd mit wolbedachtem müt zü der zeit do ich ez wol getün mocht, geben vnd bestät han durch meiner vnd aller meiner vodern vnd nachchomen Selen willen mein gut genant ze Chelchsmosen zu sand Andres gotshaus ze Chitzpühel also daz man vns da von alle Iar einen ewigen iartag bege nach des briefs sag den daz egenant gotshaus von vns inn hat ¹⁾, zü dem selben güt vnd zu dem selben Iartag han ich geben vnd geschafft drew phunt perner Iärleich gelts auf meinem acker der da leit in dem vodern marchtveld hinder Seybot Grätleins. So han ich geschafft auf meinem tail ze vnterueld daz man all iar ewichleich geben schol den di zu gotsleichnam gent in sand Andres gotshaus ain patzeyd ²⁾ weins an vnserr frawn tag in der vasten vnd ainiv an dem antlaz tag vnd ainiv an dem Karfreytag Ich han euch geschafft auf dem selben güt fünf schilling phenning vnd sechs phenning Iärleichs gelts, der man geben schol ewichleich all freytag drey phenning armen lewten vmb prot. Ich han auch geschafft sand Kathrein Chapellen in dem Marcht ze Chitzpühel ein halb phunt gelts oder zehen phunt phenning auf meinem acker der leit in dem hindern marchtveld vnd stözzt an die prunn piwnt in aller weis als der prief sagt den daz selb gotshaus von mir inn hat. Ich han auch geschafft vnd bestätt ein pfunt pfenning Iärleichs vnd ewigs gelts ein daz lieht daz da print in sand Andres gotshaus vor gotsleichnam auf meinem halben haus daz ich meiner wirtinn geschafft han ³⁾, also mit der beschaiden wan si dem vorgenanten gotshaus vnd in daz selb liecht chaufft ein phunt gelts rechtz aigen so ist ir daz vorgenant halb haus ledig vnd los, vnd mag da mit schaffen vnd tun waz si wil. Ez schol auch mein vorgenant wirtinn di vorgenant gült vnd güt inn haben mit allen nützen vnd rechten ir lebtag also daz si daz vorgenant geschäfft all Iar da von vol pring vnd volfür als obgeschriben stet. Wär abber ob si dar an indert sawmich wär oder wann si nimmer wär, so schol sich sand Andres Chirchprobst wer der ze der zeit ist vollen gewalt haben derselben gült vnd güt sich ze vnderwinden dem selben gotshaus vnd daz selb geschäfft Iärleich da von ze vol füren vnd ze volbringen als vor geschriben stet an all ir vnd meiner erben vnd frewnt widerred. Daz mir vnd allen meinen vodern vnd nachchomen daz vorgeschriben geschäfft also stät vnd vnzebrochen beleib, dar vber ze einem waren vrchund gib ich den vorgenanten gotshewsern den brief versigelten mit meinem aigen anhangenden Insigel. Dez sint zewg Herr Ortolf ze den zeiten vicarij zü sand Iohans Chirchen Herr Hans ze den zeiten verweser datz Spital, Oswald Schönstain, Hainrich Meylinger, Pärtel Swab, Fridreich ab dem Pühel, Peter Gramätsch, Hainrich sein Sun, Ott Pühler vnd ander Erber lewt genüg. Datum anno domini M ^o ccc ^o lxviiij ^o In die sancti Mathei apostoli et ewangeliste.

Source Fulltext: DOPPLER