Ich Hainrich Gresweyn vergich für mich vnd für all mein Erben Daz ich mit gütem willen vnd nach meiner frumt Rat. ze der zeit. da ich ez wol getün macht. geben vnd bestaet han. mein güt genant Gechstat. ¹⁾ daz leit pei Awraw ²⁾ ein Chiczpüchler gericht mit allen eren Rechten vnd nüczen die dar zü gehorent wie die genant sind besücht vnd vnbesücht Sand Andres goczhaus ze Chiczpühel. also daz mir dez selben goczhaus Chirichprobst der ieczu ist oder fürpaz wirt mir vnd allen meinen vodern vnd nachchom Ewichleich all iar einen Iartag da von begen schol vor sand Gallen tag oder nach ein den nachsten acht tagen als vil daz güt ze ieder zeit gelten vnd vertragen mag. an als vil daz man dem Goczhaus von Altenmünster ³⁾ all iar da von geben schol ain halbs phunt phenning. Ez schol auch der Chirichprobst ze allen zeiten daz selb güt Stifften vnd den iartag begen nach Wernharcz vnd Niclas der Münchawer vnd Hansen des Oechsenperger Rat. vnd ob die abgieng so schol er ez tün nach der nachsten zwaiger frunt Rat. die dann lebent. wan ich den vorgenanten meinen frumten die handlung vnd all mein geschafft enpholhen han hincz irn treun. ich han auch daz selb güt aufgesant an daz goczhaus von Altenmünster. da von ich ez ze lehen gehabt han den vorgenanten Wernharten vnd Niclan den Münichawer vnd Hannsen dem Oechsenperger ze leichen als lehens Recht ist also daz Si dez goczhauss sand Andres getrew trager vnd behalter ein treus hant. vnd wann die abgieng so schol ez Enphahen der nachsten frumt ainer. ein der selben weis vnd schol auch daz weren ab ainem frumt auf den andern. waer daz die abgieng. so schol ez enphahen wer dez selben goczhaus chirichprobst ist. Ez schullen auch dem Chirichprobst die weisat voligen all iar von seiner mü Dez ze vrchund gib ich dem vorgenanten goczhaus den prief versigelt mit meinem aigen anhangendem insigel. Dez sint zeug Vlreich Greswein Hainreich Lyntawer Nicla vnd Fricz Dietleins Sun von Zymeraw Fridreich Egker von Halerdorf vnd ander Erber laeut genüg. Datum anno domini M ^o ccc ^o lx Nono in die beati Kalixti pape.

Source Fulltext: DOPPLER