Ich Peter Dürrenpacher vergich für mich vnd für all mein erben Daz ich mit wolbedachtem muet zue der zeit do ich ez wol getuen mocht geben vnd geschafft han sand Andres gotshaus ze Chitzpühel durch mein vnd aller meiner vodern vnd nachchomen Sel willen mein guet genant Pentzenuelden daz da leit in Marchartstainer gericht mit allen eren rechten vnd nützen ez sey mül oder wie daz genant sei besuecht vnd vnbesuecht also für ledigz vnd vreyez aygen, daz mir vnd meinen vodern vnd nachchomen dauon begangen schol werden alle jar ein ewiger jartag, vnd han auch daz selb guet des vorgenanten gotshaus Chirchprobst eingeantwurt ledig vnd los also mit der beschaiden daz mein wirtin Chlara von den selben nützen all jar den jartag pegen schol vor Weyhnachten in den nachsten viertzehen tagen an geuär ir lebtag. Wär aber si dar an säwmich oder wann si nimmer wär so schol daz des vorgenanten gotshaus Chirchprobst, wer der ze der zeit ist, da von pegen als verr di nütz geraichen mügen von dem vorgenanten guet an all ir vnd meiner erben vnd frewnt widerred. Ez schol auch des vorgenanten gotshaus Chirchprobst von den nützen haben alle jar zwelf pfenning von seiner mü vnd dem Mesner zwier pfenning Dar vber ze ainem waren vrchund gib ich dem vorgenanten gotshaus den brief versigelten mit meinem anhangenden Insigel vnd mit Larentzen des Slunts ze der zeit Richter ze Chitzpühel hangenden Insigel im an schaden Des sint zewg Stephan Märenbanger Wolfhart Prästel Hainrich Meylinger Christ. Rudland vnd ander erberg lewt genueg Datum anno domini M ^o ccc ^o lxviiij ^o In die sancti Mathei apostoli.

Source Fulltext: DOPPLER